Kezinde Stalın kolhozy bolǵan shaǵyn ǵana aýyldan 7 birdeı Eńbek Eri shyqqan. Eńbekpen eseıgen aýyl turǵyndary qazirgi kezde de negizinen mal sharýashylyǵymen aınalysyp, kún kóredi. Sonymen qatar bul aýylǵa memlekettiń qoldaýy da az emes. «Aýyl – el besigi», «Týǵan jerge týyńdy tik!» baǵdarlamalary aıasynda birqatar nysan boı kóterip, el ıgiligine berilgen. Búginde aýylda jańa salynǵan mádenıet, sport nysandary jumys isteıdi. Jaryq, gaz tartylǵan. Aýylda 2 orta mektep bar bolsa, endi 300 oryndyq úshinshi mekteptiń de qurylysy júrgizilýde. Aýdan ákimi Nurjan Nurjigitovtiń aıtýynsha, Býryl aýylynda jaqsy bastamalar kóp. Máselen, memlekettiń qoldaýymen bólingen 589 mıllıon teńgege aýyldaǵy 10 kóshe jóndelgen. Okrýgke qarasty Býryl jáne Qumjota aýyldarynda 2 kóshege jaıaý júrginshiler joly salynǵan. Bir aıta keterligi, aýyl kósheleri 30 jyl boıy jóndeý kórmegen. Sonymen qatar buryn Mádenıet úıi bolmaǵan aýylda 157 mıllıon teńgege 180 oryndyq mádenıet nysany salynǵan. Búginde jergilikti jurtshylyq munyń ıgiligin kórip otyr. Aýyl jastaryn salamatty ómir saltyn ustanýǵa tárbıeleý maqsatynda aýyldan jalpy quny 323 mıllıon teńge bolatyn sport kesheni boı kótergen. Sondaı-aq demeýshiler esebinen jazǵy sport alańy men kishi fýtbol alańshasy da ashylǵan.
Aýyldy kórkeıtý – keleli is. Búginde bir úıdiń balasyndaı tatý-tátti ǵumyr keship jatqan Býryl turǵyndary aýyldyń ár jetistigine qýanady. Aýyldyq okrýgtiń ákimi Erik Áliqulovtyń aıtýynsha, aýylda mal urlyǵy, kisi tonaý sııaqty teris áreketter oryn almaǵan. Qaıta turǵyndardyń suranysyna oraı, Býryl men Qumjota eldi mekenderindegi kósheler jóndelip, el onyń ıgiligin kórýde. Máselen, aýyldardaǵy barlyǵy 64 shaqyrym jol 820 mıllıon teńgege qaıta jaraqtandyrylǵan. «Aýyldan Seńkibaı, Belqoja, О́temis kanaldary ótedi. Bıyl Belqoja kanaly 16 mıllıon 800 myń teńgege orta jóndeýden ótti. Jalpy, aýyldyq okrýgte 14 jańa turǵynjaı ıini bar bolatyn bolsa, Baızaq datqa, Nur, Araı ıinderine 94 mıllıon 600 myń teńge bólinip, túngi jaryqtandyrý jumystary júrgizildi», deıdi Erik Áliqulov.
Qazirgi kezde aýyl ortalyǵynan «Jeńis» saıabaǵy salynýda. Sonymen qatar «Táýelsizdik monýmenti» nysanyn qaıta jaraqtandyrý maqsatynda 7 mıllıon 49 myń teńge bólingen. Búginde aýyldan turǵyndardyń qaýipsizdigin qamtamasyz etý maqsatynda polısııa pýnkti ashylyp, munda 7 adam jumyspen qamtylǵan. Endi aýyl ishinde avtobýstar júrgizý máselesi josparda bar eken.
Jambyl oblysy
