Cát saıyn qaryshtap damyp jatqan qazirgi zamanda, onyń ishinde, sportta aǵylshyn tiliniń orny bólek. Aǵylshyn tili – olımpıadalyq qozǵalystyń resmı tilderiniń biri sanalady, kóptegen el jarys ótkizer kezde týrnırdiń resmı tili retinde aǵylshyn tilin paıdalanady. Sondyqtan da Qazaqstan komandasy sportshylarynyń aǵylshyn tili boıynsha bazalyq bilimge ıe bolǵany óte mańyzdy. О́ıtkeni týrnırge, tóreshiler alqasynyń baǵasyna pikir bildirý úshin kez kelgen elde aǵylshyn tilinde jaýap qatý qajet. Sondaı-aq sporttyq ortada ózara baılanys ustaý úshin de mańyzdy. Munda kóp nárse sporttyń túrine baılanysty. Árbir sport túrinde ózine ǵana tán jáne beıresmı termınder kóp, olardyń barlyǵyn birdeı sózdikten taba bermeısiz. Árıne, bapkerlik qyzmette de tildi bilgenniń artyqtyǵy joq. Odan bólek, sportshynyń tulǵa retinde ósýine aǵylshyn tiliniń septigi kóp tıedi. Aǵylshyn tilin bilý arqyly bilim salasynda qosymsha múmkindikter paıda bolyp, almasyp oqý jónindegi halyqaralyq baǵdarlamalarǵa jol ashylady. Aǵylshyn tilin jetik meńgergen atletter sporttyq mansabyn aıaqtaǵan soń da jerde qalmaıdy.
Sportshylarǵa aǵylshyn tilin arnaıy shaqyrylǵan lektor Djess Bıorden úıretedi. Bıorden tájirıbeli oqytýshylardyń biri, ol 15 jyldan asa ýaqyttan beri stýdentterge kásibı túrde bilim berip keledi. Odan bólek, sportshylarǵa arnaıy oqý baǵdarlamasy qurastyryldy. Baǵdarlama sportqa jáne sporttyq mádenıetke baǵyttalǵan. Bul baǵdarlama boıynsha bilim alý arqyly bizdiń sportshylar sheteldik jýrnalısterge suhbat berip, tildi qoldanýdyń bazalyq qaǵıdalaryn túsinedi.
«Biz úshin aǵylshyn tilin úırenýge úlken múmkindik berilip otyr. UOK bizge oqý-jattyǵý jıyndary men jarystardy ǵana uıymdastyryp qoımaı, ári qaraı damýymyzǵa da oń áser etip jatqany qýantady. Aǵylshyn tilin úırenýdi kópten beri oılap júr edim. Mine, endi sáti tústi. Til úırený bizge qosymsha múmkindikter beredi. Onyń ústine, ártúrli el sportshylarymen shúıirkelesip, óz tájirıbeńmen bólisken keremet dep oılaımyn. Aǵylshyn tilin sportshylarǵa arnaıy jasalǵan baǵdarlama boıynsha oqyp jatqanymyz da úlken kómek. Toptaǵylardyń bári men sııaqty sportshy bolǵandyqtan, bir birimizdi jaqsy túsinemiz. Kýrs aıaqtalǵan soń aǵylshyn tilin jaqsy túsinemin degen nıettemin», deıdi bokstan Tokıo Olımpıadasy joldamasynyń ıegeri Abylaıhan Júsipov.
Baǵdarlamaǵa 24 sportshy qatysýda. Kýrs qatysýshylary Qazaqstan ulttyq qurama komandalarynan kelgen 280 atlet arasynan tańdap alyndy. Sondaı-aq aǵylshyn tilin úırený úshin elimizdiń birinshi nómirli sportshylary men Qazaqstan atyn álemdik arenada tanytyp júrgen úzdikter irikteldi.
