«Barys» hokkeıshileri buǵan deıin syrt aıdyndarda ala-qula oınap júr. Biraq bul joly jerlesterimiz qonaqtaǵy oıyndar serııasyn jeńispen bastady. «Traktor Arena» sport kesheninde ótken kezdesýdiń esebin «Barys» oıynshysy Roman Starchenko ashty. Al ekinshi kezeńde Nıkıta Mıhaılıs mergendigimen kózge túsip, esepti eseledi. Úshinshi kezeń bastalysymen-aq Mett Frettın «Barys» komandasynyń basymdyǵyn odan ári nyǵaıtyp, esepti 3:0-ge jetkizgen-di.
Aıdyn ıeleriniń alǵashqy golyn Loýrens Pılýt soqty. Arada bir mınýt ótkende Lınýs Vıdell «Barystyń» tórtinshi shaıbasyn soǵyp, jergilikti jankúıerlerdiń jeńisten úmitin úzdi. Sońǵy kezeńniń orta tusynda Lýkash Sedlak komandasynyń ekinshi golyn soqqanymen, «Traktordy» jeńilisten qutqaryp qala almady. Qorytyndy esep – 4:2. Búginge deıin 32 kezdesý ótkizgen «Barystyń» enshisinde 35 upaı bar. Olar «Shyǵys» konferensııasynda 8-orynda tur. Elordalyq klýb kelesi kezdesýin 19 jeltoqsanda Qytaıdyń «Kýnlýn» komandasymen ótkizedi.
