Memlekettik grant negizinde qaıtarymsyz qarajat alǵan qala turǵyndary óz isterin bastap otyr. Olar kóbinese tigin, kondıterlik ónimder ázirleý men mal sharýashylyǵyna tańdaý bildirgen.
Shymkent qalalyq halyqty jumyspen qamtý ortalyǵy mamandarynyń málimetinshe bul baǵyt boıynsha jumystar bıylǵy jyldyń 11 aıy ishinde 98 paıyzǵa oryndalǵan. Jańa bıznes-ıdeıalardy iske asyrýǵa arnalǵan memlekettik grant qarajaty eńbekke qajetti qural-jabdyqtar alýǵa jáne aýyl sharýashylyǵymen aınalysýǵa nıet bildirgenderge kóp járdemin tıgizip otyr.
Memlekettik grantqa baǵdarlamanyń birinshi baǵyty sheńberinde oqýdy aıaqtaǵan nemese «Bastaý-Bıznes» jobasy boıynsha kásipkerlik negizderine oqytý kýrsynan ótken jáne buǵan deıin memlekettik baǵdarlamalar aıasynda grant almaǵan jastar, kópbalaly jáne tabysy az otbasylardyń músheleri, eńbek etýge qabiletti múgedekter men shet memleketterden qonys aýdarǵan azamattar úmitker bola alady.
Al nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasynyń ekinshi baǵyty boıynsha 2820 adam «Bastaý bıznes» jobasy boıynsha oqýǵa joldanǵan. Sonymen qatar aýylsharýashylyǵyn qarjylaı qoldaý qorymen túzilgen kelisimniń nátıjesinde 74 shymkenttik shaǵyn nesıege qol jetkizgen.
