Almaty oblysyndaǵy Qarabulaq aýylynyń turǵyndary aýyz sýdyń azabyn tartyp otyrǵanyna 20 jyldan asty. Bul týraly «24» kz habarlady.
Úıiniń aýlasynan qudyq qazýǵa shamasy kelmeıtin otbasylar Tentek ózeninen sý tasyp ishýge májbúr. Jergilikti atqarýshy bılik ókilderiniń aıtýynsha, bul aýylǵa memlekettik «Aq bulaq» baǵdarlamasy boıynsha bolashaqta qubyr tartý josparda bar.
Mundaǵy turǵyndardyń aýyz sýdyń azabyn tartqany sonshalyq, áýeli qudyq sýyn tundyryp, sosyn qaınatyp ishedi eken.«Sýdy tundyryp ishpeseń, ishinde qum bar. Aýylda búırekteri aýyrǵandar, odan tas aldyrǵandar kóbeıip ketti. Osy sýdyń áserinen»,-deıdi Qarabulaq aýylynyń turǵyny Rahmet Jumashev.
Osy óńirdegi Alakól aýdanynda 56 aýyl bolsa, 39 aýyl áli aýyz sýǵa tolyq jarymaı otyr. Jalpy, 2002-2008 jyldary 8 aýylǵa qubyr tartylǵan eken. Al 2010 jyldan beri 5 aýylǵa ǵana sý berilgen.
«Memleketten úlken qarajat bólingendikten, biz jobalaý jumystaryna kóp kóńil bólip otyrmyz. Bıylǵy jyly 4 aýyldyń jobalaý jumystaryn daıyndaýdy josparladyq. Osyndaı qarqynmen 2018 jyly aýyldardy 70 paıyz aýyz sýmen qamtýǵa múmkindik jasalady»,-deıdi Alakól aýdandyq TKSh bóliminiń bastyǵy Maqsat Julqaınarov.
Jospar oryndalyp jatqanymen, aýdandyq prokýratýra jasalǵan jumysqa qatysty talaı zańsyzdyqty anyqtaǵan. Máselen, aýdandyq turǵyn úı-kommýnalyq sharýashylyǵy bóliminiń burynǵy basshysy Úsharal qalasyna sý qubyryn júrgizgen «Teh montaj» merdiger mekemesimen sybaılasyp, atqarylmaǵan aktilerge qol qoıǵan.
«Sybaılas jemqorlyqqa qatysty qylmystyq is anyqtaldy. Aýdandyq kommýnaldyq bóliminiń basshysy Botabaev degen azamat merdigerdiń jasalmaǵan jumysyn jasaldy dep qabyldaý jóninde akt toltyrǵan. Qazirgi kezde Botabaev sottaldy»-deıdi Alakól aýdanynyń prokýrory Erlan Ańdabaev.
Baqytbek Keneshuly.
Derekkóz: «24 kz»
