Elordada ótken ortalyq forýmǵa Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Nursultan Nazarbaev qorynyń dırektory Darıǵa Nazarbaeva, «El úmiti» jáne «Qamqorlyq» bastamalarynyń qamqorshylar keńesiniń tóraǵasy, Prezıdenttiń kómekshisi - Qazaqstan Respýblıkasy Qaýipsizdik Keńesiniń hatshysy Áset Isekeshev qatysty.
Forýmnyń basty qatysýshylary «El úmiti» bastamasynyń - «Elbasy medali» jobasy, «El maqtanyshy» syılyǵy, aýyl oqýshylary arasynda ótken «Myń bala» olımpıadasynyń jeńimpazdary boldy.
«Táýelsizdik jolyn jalǵastyrar urpaq» forýmyn Nursultan Nazarbaev Qory uıymdastyrdy.
Elbasy «Qamqorlyq» bastamasyn iske asyrýdyń mańyzdylyǵyna nazar aýdardy.
«Búgingi tańda elimizdiń segiz óńirinde ashylǵan aýrýhanalar janyndaǵy ońaltý ortalyqtary men mektepter janyndaǵy ınklıýzııany qoldaý kabınetteri úzdik jabdyqty paıdalana otyryp, jyl saıyn bes myń balaǵa tegin keshendi ońaltý kórsetýge múmkindik beredi», dedi Nursultan Nazarbaev.
«El Úmiti» jáne «Qamqorlyq» bastamalarynyń jobalary is júzinde qoǵamymyzdyń qajettilikterine tolyq sáıkes keletindigin dáleldedi. Aldyn ala qorytyndylar bul bastamalardyń eleýli saıası jáne áleýmettik áserin kórsetti.
Forým sońynda damý erekshelikteri bar balalarǵa arnalǵan 8 ońaltý ortalyǵynyń ashylý rásimi ótti. Ortalyqtardy qurýdy Nursultan Nazarbaev Qory óńirlik ákimdiktermen birlesip júzege asyrdy. «Samuryq – Qazyna» UÁQ» AQ ortalyqtardy arnaıy jabdyqtarmen qamtamasyz etti.
Ár ortalyqta 13-ten astam kabınet bar. Olar EDT jáne mehanoterapııa, balneoterapııa, ergoterapııa, fızıoterapııa, logopedııa, defektologııa, BKB terapııa zaldary, shýngıtti jáne tuzdy bólmeler. Osylaısha bul ortalyqtar jyl saıyn damý erekshelikteri bar 5 myń balaǵa kómek kórsete alady, onda sany 30-dan astam ár túrli keshendi qyzmet túrleri tegin kórsetiledi.
