Qaı halyqtyń da, qaı memlekettiń de negizgi merekesi – ulttyq Táýelsizdik kúni. El Prezıdenti Qasym-Jomart Toqaev osy merekege oraı el azamattaryn marapattaý rásiminde táýelsizdikten keıingi tarıhı oqıǵalarǵa toqtalyp ótti.
Prezıdent aıtqandaı, Táýelsizdik jyldarynda elimizde atqarylǵan jumys óte kóp. Olardyń barlyǵy el tarıhynda altyn árippen jazylyp qaldy. Ásirese, eldigimiz synalǵan sátterde halqymyzdyń birlik pen yntymaqty tý etip, jumyla eńbek etkenin erekshe atap ótýge bolady.
Táýelsizdigimizdiń 29 jylyn tarıh enshisine qaldyryp, elimiz egemendiginiń otyzynshy jylyn bastaǵaly otyrmyz. Osy aralyqta irgeli elge aınalyp, memlekettiligimiz ornyqty. Zaman talabyna saı memleket qurdyq, onyń tıimdi basqarý apparatyn qalyptastyrdyq. Osy jumystardyń basynda Qazaqstannyń Tuńǵysh Prezıdenti – Elbasy Nursultan Nazarbaev turdy. Endi bul jumysty Qasym-Jomart Toqaev jalǵastyryp, elimizdi alǵa bastap keledi. Elimizdiń aldynda turǵan mindetter óte aýqymdy. Olardy el-jurt bolyp eńserýimiz kerek.
Prezıdent aıtyp ótkendeı, halyq turmysyn jaqsartý, azamattardyń ál-aýqatyn arttyrý, áljýaz toptarǵa kómek kórsetý jumystary aldaǵy ýaqytta júıeli túrde júzege asatyn bolady. Elimizdiń aldynda maqsatty baǵdar tur. Al sol maqsatqa jetý úshin beıbit kún kerek, halqymyz bir adamdaı jumylyp eńbek etýi kerek.
Qazirgi tańda álemdi jaılaǵan pandemııaǵa qarsy kúres – kún tártibinde turǵan basty máselelerdiń biri bolyp otyr. Osy turǵydan aıtsaq, memleket pen qoǵam birlese jumys istep, qıyndyqty eńserip keledi. El Prezıdenti Qasym-Jomart Toqaevtyń uıymdastyrýymen indetke qarsy kúres jumystary kún ótken saıyn jandanyp, halyqty dári-dármekpen, qural-jabdyqtarmen qamtamasyz etý isi bir júıege tústi.
Osy arada aıta keteıin, dárigerler men quqyq qorǵaý salasy qyzmetkerleriniń atqarǵan jumystary ushan-teńiz. Olar bastaryn ólimge tige júrip, halyq úshin qyzmet etýde. Basqalardy qutqaramyn dep ómirin qıǵandar da jeterlik. Sońǵy jyldary elimizde pandemııadan bólek qıyn-qystaý jaǵdaı kóp boldy. Arystaǵy jarylys, Maqtaaraldaǵy sý tasqyny kezinde Memleket basshysy sabyrmen tııanaqty, jan-jaqty jumystar júrgize bildi. Sonyń barlyǵy óziniń oń nátıjesin berdi.
Osy rette baı tájirıbesimen, túıgenimen elimizdiń ardagerleri de ıgi isterge atsalysyp keledi. El ardagerleri baǵa jetpes baılyq. Olardyń tájirıbesi qashanda qajet. Qazirgi qıyn-qystaý kezeńde halyqty sabyrǵa shaqyryp, bilgenimen bólisip, kómek kórsetýde, erteńge úmitpen qaraýǵa úndeýde. Qoǵam birligi – baǵa jetpes baılyq. Aldaǵy kúnderge úmitimiz zor.
О́mirzaq OZǴANBAEV,
tarıh ǵylymdarynyń doktory, professor,
«Ardagerler uıymy» Ortalyq keńesi tóraǵasynyń birinshi orynbasary
