Báleket indet el basyna zor qaýip-qaterin tóndirgen kezeń bárimiz úshin úlken synaq boldy. Osynaý qysyltaıań shaqta eldigimiz ben birligimizdiń synalǵany anyq. Memleket tarapynan kóptegen is-shara júzege asyrylyp, jumysy turalap qalǵan azamattardan bastap az qamtylǵan otbasylarǵa deıin jan-jaqty áleýmettik qoldaý kórsetildi.
Indet qos búıirden qysqan kúrdeli kezeńge qaramaı, úlken is atqaryldy. Osy oraıda Qazaqstannyń 8 oblysynda ashylǵan ońaltý ortalyqtaryn erekshe atap óter edim. Bul ıgi is Elbasy Nursultan Nazarbaevtyń «Qamqorlyq» bastamasynyń aıasynda júzege asty. Atalǵan is-sharalar «Bıbi-Ana» qaıyrymdylyq qorynyń birneshe jyldan beri kóterip kele jatqan máseleleriniń de sheshilýine yqpal etti. Mundaı ortalyqtar múgedek balalardy damytýǵa úlken septigin tıgizedi. Sondyqtan ońaltý ortalyqtarynyń ashylǵanyna qýanyp qalǵan analar qaýymy bizge habarlasyp, alǵysyn jetkizýimizdi surap jatyr.
Bıyl biz baýyrmaldyǵymyzdyń, birligimizdiń aıǵaǵyndaı bolǵan kóptegen qaıyrymdy istiń kýási boldyq. О́zimiz de elge degen janashyrlyqpen, qamqorlyqpen birshama iske qolǵabys ettik. Qazir Aqtóbe oblysy Shalqar aýdanynda ońaltý ortalyǵyn ashýǵa atsalysyp jatyrmyz. Meniń anam «Jaqsylyqty áýeli adal eńbegińmen otbasyńa jasaýǵa tyrys. Otbasyńnan aýyssań kórshińe, aýylyńa jasa, ári qaraı deńgeıiń jetse, elińe jasa» dep aıtyp otyratyn edi.
Qaıyrymdy qoǵam – ádiletti qoǵam. Ádildiktiń saltanat qurǵany qoǵamdyq turaqtylyqqa negiz bolady. Al turaqtylyq bul bizdiń qasterli Táýelsizdigimizdiń baıandy bolýy der edim. Qazaqstannyń úlken ózgeristerge bet burǵanyna qýanamyz. El ekonomıkasy ilgeri jyljyp, áleýmettiń ál-aýqaty jaqsaryp, bastamalardyń bári ońynan júzege asa bersin, Táýelsizdigimiz jasaı bersin!
Bıbigúl IMANǴAZINA,
«Bıbi-Ana» qaıyrymdylyq qorynyń prezıdenti
