Táýelsizdik – el bıiktiginiń beınesi, alyptyǵymyzdyń aınasy, tatýlyǵy-myzdyń tiregi. El Prezıdenti atap ótkendeı, «Bul – ulttyń rýhyn kóteretin, urpaqtyń mereıin ósiretin mártebeli meıram». Ár jyly biz eń basty ulttyq merekemizdi atap óte otyryp, osy bir kıeli qundylyǵymyzdyń táýelsiz memleket retinde órkendeýdegi orny men róline kóz jetkize túsemiz.
1991 jyly 16 jeltoqsanda Parlament «Qazaqstan Respýblıkasynyń memlekettik táýelsizdigi týraly» Konstıtýsııalyq zańdy qabyldady. Bul Zań elimizdiń egemendigi men tutastyǵyn ári álemniń saıası kartasyndaǵy ornyn máńgilikke bekitti. Egemen elimizdiń bul Zańy ata-babamyzdyń táýelsiz memleket qurý týraly armanynyń júzege asýynyń kórinisi bolyp tabylady. Osylaısha, egemendigimizdi jarııalaǵannan keıin ǵana biz derbes saıasatymyzdy júrgizýge múmkindik aldyq. Tarıhymyzdy túgendep, tilimiz ben dinimizdi qaıta oralttyq,
29 jyl tarıh kózimen qaraǵanda shamaly ǵana merzim. Alaıda, osy kezeńde Elbasynyń sarabdal saıasatynyń nátıjesinde tarıhı sheshimder qabyldanyp, egemen eldiń irgetasy bekidi, aýqymdy reformalar júrgizildi. Memlekettik shekaramyz bekemdelip, álem elderimen senimdi dostyq jáne yntymaqtastyq qarym-qatynas ornatyldy. Tuńǵysh Prezıdentimizdiń bastamasymen Qazaqstan halqy Assambleıasy quryldy, «Bolashaq» baǵdarlamasy arqyly jastar álemniń úzdik oqý oryndarynda bilim alýda.
Tarıhı turǵydan az ýaqyt ishinde Qazaqstan damyǵan naryqtyq ekonomıkasy, ornyqty saıası júıesi bar osy zamanǵy memleket retinde qalyptasty. Beıbitshilik súıgish el retinde ıadrolyq synaqtar polıgonyn japqan Qazaqstan búginde ıadrolyq qaýipsizdik reıtınginde eń qaýipsiz elderdiń qataryna kiredi.
Táýelsiz eldiń ókiletti jáne zań shyǵarýshy organy retinde qos palataly Parlamenttiń qurylýy – memlekettiń jańa damý satysyna kóterilgendiginiń aıqyn bir kórsetkishi. Búgingi kúni Qazaqstan Parlamenti memleketimizdiń damýyna asa qajetti, ýaqytpen úndes ári ekonomıkalyq damýdy ilgerilete túsetin sapaly zańdardy qabyldap keledi.
Táýelsizdiktiń alǵashqy kúnderinen bastap elimizdiń saıasaty uzaq merzimge negizdeldi, qazaqstandyqtardyń ál-aýqaty, ómirdiń joǵary sapasyna júıeli de maqsatty umtylysy onyń basty ustanymdary retinde aıqyndalyp, sabaqtastyq taýyp keledi. Qazirgi Qazaqstan óziniń tarıhı jerinde jańa úlgidegi qazaq memlekettiligin jańǵyrtyp, əlemde tolyqqandy memleket retinde ómir súrýge qajetti barlyq qurylymdar men múmkindikterge ıe boldy. Osy áleýetimizdi tıimdi paıdalanyp, básekege qabiletti el ataný úshin búkil qoǵam bolyp biliktiligimizdi, kúsh-jigerimizdi ortaq maqsatqa jumyldyrýymyz qajet.
Táýelsizdiktiń ár jyly tarıhta óz erekshelikterimen qalady. Bıyl Uly Abaıdyń 175 jyldyq mereıtoıy, Ál-Farabıdiń 1150 jyldyǵy, Uly Otan soǵysyndaǵy Jeńistiń 75 jyldyǵy, Konstıtýsııamyz ben Qazaqstan halqy Assambleıasynyń 25 jyldyǵy sııaqty aıtýly datalar atap ótildi. Keler jyl – Táýelsizdigimizge 30 jyl tolatyn merekelik jyl.
Memleket basshysy Qasym-Jomart Toqaev mereıtoı jylynda saıası jáne ekonomıkalyq reformalar odan ári jalǵasatynyn aıta kelip, sıfrlandyrý, adam quqyqtaryn qorǵaý, densaýlyq saqtaý jáne bilim berýdi damytý, ekologııany qorǵaý aıasynda aýqymdy ister júzege asatynyn atap ótken bolatyn. «Búkil halqymyz zaman aǵymyna ilese bilýge tıis. О́zgeristerge beıimdele alatyn jurt qana ýaqyt tynysyn dóp basady. Biz bilimdi əri bilikti, uqypty jəne jaýapty, isker de eńbekqor jurt bolýymyz qajet», dedi Prezıdent.
Bul aıtýly beleske jańa jetistiktermen qadam basyp, táýelsiz elimizdiń damyp, órkendeýine barynsha atsalysyp, el rýhyn asqaqtata beremiz dep senemin.
Dúısenǵazy MÝSIN,
Parlament Senatynyń depýtaty
