Qaýipti indettiń birinshi tolqynynda bul óńirde de medısınalyq betperdeniń tapshylyǵy baıqaldy. Keıbir dárihanalarda onyń baǵasy sharyqtap, 500 teńgeden asty. El-jurt qınalǵan sondaı sátte bir rettik shprıster men ózge de preparatty tegin taratqan zaýyttyń quryltaıshysy Mahmýt Meralıev endi medısınalyq betperde shyǵarýǵa bet burdy. Onyń bul jobasy Úkimet tarapynan qoldaý taýyp otyr. Endi medısınalyq maskanyń alǵashqy partııasy Táýelsizdik kúni qarsańynda satylymǵa túsedi.
– Qazir medısınalyq betperde shyǵarýdy qolǵa alǵan «Doktor Haýs» JShS-da 20 adam jumys isteıdi. Bir rettik medısınalyq betperde toqylmaǵan materıaldan tigiledi. Ony paıdalaný ýaqyty – 2 saǵat. Eresekterge arnalǵan úsh qabaty bar qorǵanysh betperdeniń jylyna 30 mln danasy shyǵarylady, – deıdi zaýyttyń bas ınjeneri Muhtar Mahmetov. – Bolashaqta balalarǵa arnalǵan betperde de daıyndalady.
Onyń aıtýynsha, qazir betperde daıyndaıtyn eki jeli jumys istep tur. Endi jaqynda úshinshisi iske qosylady. Al tórtinshi jeli kórshiles Reseıden kele jatyr. Zaýyttyń qýaty aıyna 1 mıllıon 800 myń dana betperde shyǵarýǵa eseptelipti.
– Bizdiń maqsatymyz – sapaly betperde shyǵarý. Sol sebepten betperdeniń sapasy jiti tekseriledi. Arnaıy qaptamaǵa 50 danadan toptap salamyz. Bir qorapta 2 myń danasy bar, – deıdi zaýyttyń aýysym basshysy Rıza Jalmurzına.
