Sálemdeme ýaqtyly jetse ıgi...

Ulttyq operator halyqaralyq jóneltimderdi jandandyrmaq

«Qazposhta» AQ halyqaralyq posh­ta jóneltimderiniń tranzıtin jan­dan­dyrmaq nıette. Osyǵan baılanys­ty taıaýda ulttyq poshta operatory Reseı jáne Belarýsııanyń poshta qyz­metterimen yntymaqtastyq týraly kelisimge qol qoıdy. Álemde qa­lyp­tasqan jaǵdaıdy eskerip, bul rásim beınekonferensııa rejiminde qashyqtan ótkizildi. Taraptar logıstıkalyq jáne ilespe poshta qyzmetterin qarastyratyn halyqaralyq poshta jó­neltimderiniń (HPJ) tranzıtin qam­typ, damytýda uzaq merzimdi jáne ózara tıimdi áriptestik baılanysty arttyrýdy kózdep otyr.

«Bul kelisim ortaq salany birlesip órkendetýde mańyzdy. Sebebi jańa úrdister, atap aıtqanda elektrondy ko­mmersııa bizden jumysqa tyń tásilmen kirisýdi talap etedi. Osy rette aımaqtaǵy eń iri úsh poshta operatory Azııa men Eýropa arasyndaǵy aýqymdy tranzıtti arttyrý úshin kúsh birik­tiredi», dedi «Qazposhta» AQ basqarma tóraǵasy Qanat Alpysbaev.

Úshjaqty kelisimde Azııa – Eýro­pa, Eýropa – EAEO elderi jáne oǵan irgeles naryqtar, sol sekildi AQSh – EAEO elderi men kórshiles naryqtar baǵytynda halyqaralyq poshta jóneltimderiniń tranzıtin uıymdastyrý maqsatynda ónimderdi daıyndap, iske qosý kózdelgen. Sonymen qosa tıisti ýaǵdalastyqtyń aıasyn­da qatysýshylar halyqaralyq poshta jóneltimderin óńdeıtin biryńǵaı tehnologııany jáne tarıftik saıasatty ázirlemek.

«Osy kelisimge otyrý – búginde belsendi damyp jatqan tranzıt nary­ǵyn­da birlesken ónimderdi artty­rýda mańyzdy qadam. Tuty­ný­shy­myz­dyń talǵamy ózgerdi. Onlaın rejimindegi qyzmetke jyldam aýysýǵa elektrondy kommersııa salasyndaǵy zamanaýı logıstıkalyq qyzmetter qajet. Sondyqtan áriptesterimizben biri­gip, osy baǵyttaǵy jumysty jal­ǵas­tyryp kelemiz», dedi «Pochta Ros­sıı» AQ bas dırektory Maksım Akımov.

Atalǵan kelisimde ekonomıkalyq múddelerdiń, sondaı-aq ár organnyń basqarý táýelsizdigi saqtalýynyń mańyz­dylyǵy qarastyrylǵan. Arna­ıy jol kartasy ázirlengennen keıin poshta operatorlary kózdelgen jumystardy iske asyrýǵa kirisedi. Bul qujat keler jyldyń birinshi toq­sanynda daıyn bolýy tıis.

«Qazposhta» AQ byltyrǵy qar­jy­lyq esebi boıynsha kompa­nııa­nyń uzaq jáne qysqa merzimdi aktıvteri 111 685 969 teńgeni qurady. Menshikti kapıtaldyń jıyntyǵy 40 813 175 teńgege jetse, uzaq jáne qysqa mer­zim­di mindettemelerdiń kólemi –
70 872 794 (2018 jyly 94 434 444 teńge) teńge. Bıylǵy qyrkúıektegi jaǵdaı boıynsha ulttyq operatordyń uzaq jáne qysqa merzimdi aktıvteri – 
(61 643 637/ 45 811 103 teńge) 108 454 740 teńge. Menshikti kapıtaldyń jıyn­tyǵy – 38 608 180 teńge. Uzaq jáne qys­qa merzimdi mindettemelerdiń kóle­mi – 69 846 560 (10 485 644/ 59 360 916 teńge) teńge.

Jańa tarıf sapany arttyra ma?

10 qazannan bastap «Qazposhta» jeke tulǵalarǵa arnalǵan qarjylyq qyz­metterge baılanysty jańa tarıf­ter­di engizdi. Bul tarıftik keste bank shotyndaǵy operasııalardy (ashý, júrgizý jáne jabý), kassalyq jáne aýdarym prosesterin, sol sekildi bro­kerlik qyzmetterdi qamtıdy. Kez kel­gen qyzmetke qatysty tarıfti qaı­ta qarap, ózgertý ýaqyt óte júre­tin úr­dis bolǵan soń ádette bul naryq­tyq jaǵdaıdyń ózgerýimen, sony­men qosa operasııalyq tıimdilikti art­ty­rý­daǵy korporatıvtik talaptarmen aı­qyndalady dep túsindiredi ulttyq posh­ta operatory.

«Máselen, kommýnaldyq tólemniń túbirtegin óńdeýge baılanysty tarıf 4 jyldan beri ózgermegen. Sondyqtan kompanııanyń tikeleı shyǵyndaryn qys­qartyp, operasııalyq shyǵyn­dar­dy rentabeldi deńgeıge deıin teńestirý maqsatynda qaıta qaras­tyryl­dy. Kompanııa áleýmettik ja­ýap­kershilik saıasatyn ustana otyryp, azamattardyń jekelegen sanattaryna jeńildikter berý týraly sheshim qabyldady. Olarǵa qarjylyq qyzmetterdiń keıbir túrleri boıynsha tólem mólsheri (atap aıtqanda, kom­mýnaldyq tólem túbirtek quja­tyn óńdeý) 0 teńgeni quraıdy. Bul sanatqa soǵys ardagerleri, múgedek­ter, eńbek ardagerleri jatady (zeı­net­kerlik kýáligin nemese jeke kýá­li­gin kórsetken kezde, sondaı-aq tó­leý­shiniń derekteri kommýnaldyq túbir­tek­te kórsetilgen derektermen sáıkes kelgen jaǵdaıda)» delingen kompanııa taratqan aqparatta.

Salalyq uıymnyń 2027 jylǵa deıingi damytý strategııasyndaǵy basymdyqtardyń biri – kompanııany jańǵyrtýda birizdilikti ustaný. Ulttyq poshta operatory bıznes-pro­sesterdi jetildirýdi jáne óndi­ris­tik ónimdilikti arttyrýǵa baıla­nys­ty mindetti turaqty túrde she­shýdi maqsat etip otyr. Osy qyz­met­­­­­­tiń negizinde óńirlerdegi poshta bó­limsheleri jelisiniń óndiristik, eko­no­mıkalyq jáne áleýmettik tıim­dili­gi baǵalanatynyn aıta ketken oryndy.

Kompanııanyń aqparatyna súıen­sek, sońǵy jyldary jazbasha hat-habarlardy jóneltý men merzimdi basylymdardy jetkizý kóleminiń qys­qarý úrdisi baıqalýda. Buryn bul qyzmetterdiń aýyldyq jerler­de suranysy joǵary bolyp, óńir­lik poshtashylardyń negizgi jumysyn quraǵan edi. Qazir jaǵdaı túbegeıli ózgerse kerek. Áıtse de Aqparat jáne kommýnıkasııalar mınıstriniń 2016 jylǵy 20 shildedegi №44 «Poshta baılanysynyń ámbebap qyzmetteriniń sapa kórsetkishterin bekitý týraly» buıryǵyna sáıkes, poshta qyzmetimen qamtý talaptary boıynsha aýyldy eldi mekenderde keminde 2 myń adamǵa bir stasıonarlyq poshta bólimshesi (nemese jıyntyq aýyldyq okrýg bo­ıynsha) qyzmet kórsetýi tıis.

«Qyzmetter suranysyn baǵalaý nátı­jelerine sáıkes, sondaı-aq jo­ǵa­rydaǵy buıryqtyń talaptary­na súıene otyryp, kompanııa erekshe jaǵdaılarda keıbir poshta bólim­she­lerin biriktirýge, kóshirýge nemese poshtalyq-logıstıkalyq jáne qar­jy­lyq qyzmetterdi stasıonarly for­mattan jyljymaly qyzmetke aýystyrýǵa qatysty sheshimdi qaıta qaraýdy qabyldaıdy. Belgili bir bólimshelerdiń jumys formatyn nemese rejimin tolyq jumys kestesinen qysqartylǵan ýaqytqa ózgertip, kompanııa «Qazposhtanyń» qyzmetter spektri qaıta qaraýǵa jatpaıtynyn jáne onyń klıentterge tolyq, bu­­rynǵy kólemde qoljetimdi bolyp qalatynyn habarlaıdy. Buǵan qosa qazir aýyldyq bólimshelerde kór­setiletin qyzmetter paketin keńeı­tý máselesi pysyqtalyp jatyr. 2021 jyly shalǵaıdaǵy aýdandar men aýyl halqy poshta bólimshelerinde asa suranystaǵy memlekettik qyzmetterdi ala alady dep josparlanýda», deıdi kompanııa ókilderi.

Jemqorlyq
tyıylmaı tur

Tutastaı «Qazposhta» búginde aýyl­dy jerlerdegi poshta qyzmetker­le­rine óndiristik qyzmetpen birge eńbekaqy mólsherin keńeıtýge múm­kindik beretin korporatıvtik sheshim­derdi daıyndap jatyr.

Alaıda bul kvazımemlekettik uıym­nyń qyzmeti kóptiń kóńiline bir­deı jaqpaıdy. Ulttyq poshta operatoryna qatysty problemalyq jaǵdaılar az bolǵan joq. Aıtalyq, osydan eki aı buryn Ekibastuzdaǵy poshta bólimshesiniń basshysy 9,4 mln teńge kólemindegi qarajatty urlady dep kúdikke ilingen bolatyn.

«Atalǵan tulǵa 9,4 mln teńge kó­le­mindegi bıýdjet qarajatyn jeke tulǵa­lardyń karta shottaryna aýdarý arqyly jymqyrdy dep kúdikke ilindi, tergeý jumystary jalǵasyp jatyr», degen edi Sybaılas jemqorlyqqa qarsy is-qımyl agenttiginiń baspasóz qyzmeti.

О́kinishtisi sol, mundaı jaǵdaı elimizdiń basqa óńirlerinde de kez­de­­sedi. Jyldyń basynda «Qaz­posh­t­anyń» Tarazdaǵy fılıa­ly­nyń burynǵy basshysy sybaılas jem­qor­lyq qylmys deregi boıynsha sottyń sheshimimen kináli dep tanylyp, oǵan 7,5 mln teńge kóleminde aıyppul belgilenýimen qosa, ómir boıy memlekettik qyzmetten alastatý úkimi taǵaıyndaldy. Al kóktemde Batys Qazaqstandaǵy kompanııaǵa qarasty poshta bólimshesiniń basshysy 37 mln teńge kóleminde aqshany jymqyrdy degen aıyppen 7 jylǵa bas bostandyǵynan aıyryldy. Tergeý málimetterine sáıkes, sottalǵan azamat arnaıy baǵdarlamalyq jasaq­ta­many paıdalaný arqyly óziniń karta shotyna zańdy jáne jeke tulǵalardyń aqshalaı qarajatyn aýda­­ryp, sol sekildi sálemdemelerdi tóleýge arnalǵan qarajatty ıemdenip otyrǵan. Bul rette klıentterge baǵ­dar­­lamalyq jasaqtamanyń aqaýyn alǵa tar­typ, túbirtekterdi bermeýdiń jolyn tapqan.

Budan bólek qoǵamnyń ashýy­na tıetini – ortalyq basqarma bas­shylary men qatardaǵy poshta ope­ra­torlarynyń jalaqysyndaǵy al­shaq­tyq.

«Kompanııa top menedjerleriniń aılyǵy 1 mln teńgeden asady. Poshta operatorynyń eń tómengi eńbekaqysy – 47 myńnyń tóńireginde. Tipti ony 50 myńǵa kóbeıtkenniń ózinde basshylyqtyń jalaqysy 24 esege kóp», dep jazady áleýmettik jeli qoldanýshylary.

Jemqorlyq faktilerin ysyryp qoıǵannyń ózinde ulttyq opera­tor­dyń qyzmetine syn taǵýshy­lar az emes. Jasyratyny joq, aqparattyq teh­nologııa dáýirlegen zamanda kóp­shilik jekelegen kýrerlik jáne logıstıkalyq kompanııalardyń qyz­me­tine júgingendi qup kóredi. Iаndeks pen Glovo-dan bólek, otandyq naryqta Amazon kompanııasynyń qyzmetine suranys birtindep artyp keledi. Sarapshylardyń aıtýynsha, taıaý bolashaqta «Qazposhta» korporatıvtik strategııasyn zamanaýı úrdiske ıkemdeı almasa, ishki naryqty sheteldik oıynshylarǵa berýine májbúr bolady.

Alpaýyttar vaksına tasymaldaýǵa daıyndalýda

Otandyq poshta qyzmeti hat-habar men sálemdemelerdi jóneltýmen álek bolyp jatqanda, álemdik alpaýyttar pandemııaǵa qarsy vaksınany jetkizýdi meńgerip jatyr. Basqa-basqa, biraq medısınalyq dári-dármekti jetkizýdiń ózindik tártibi bar.

Qazir álemdik logıstıkanyń aldynda buryn-sońdy bolmaǵan mindet tur. Sala kóshbasshysy germanııalyq Deutsche Post DHL kompanııasynyń boljamynsha, aldaǵy bir-eki jylda shamamen 10 mlrd dozany jetkizýdi qamtamasyz etý kerek. Qalaı bolǵanda da Jer turǵyndaryna qaraǵanda ekpeniń áldeqaıda kóp bolatyny kúmánsiz. DHL-dyń esepteýleri boıynsha túrli kólik quraldarymen 200 myń júktaban (júktiń astyna qoıylatyn aǵash taban) túpqoımasyn tasymaldap, shamamen 15 myń áýe tasymalyn júzege asyrý qajet.

IATA halyqaralyq áýe kóligi qa­ýymdastyǵy Jer shary boıynsha vaksınalardy taratý naýqanyn «Buryn-sońdy bolmaǵan iri keshendi logıstıkalyq operasııa» dep baǵalap otyr. Bul uıym álem elderiniń úki­met­­terin shekaralardy ashyp, áýe qa­tynasyn qalpyna keltirýge sha­­qyrdy. О́ıtkeni karantındik sha­ra­larǵa baılanysty reısterdiń sany kúrt tómendedi. Osynyń saldarynan áýe júk tasymalynyń kólemi aı­tar­lyqtaı shektelip, jolaý­shy­lar ushaq­ta­rymen aýqymdy júk jó­nel­tý­diń múmkindigi az.

AQSh-tyń jetekshi 7 avıa­kom­pa­nııa­­sy qarashada Kongreske «vak­sınany taratýdaǵy logıstıkalyq máseleni» sheshý úshin qarjylaı kómek kórsetýdi talap etip hat joldady. Másele tasymaldaýmen ǵana shektelmeıdi. Nege deseńiz, vaksınalardy erekshe jaǵdaıda, atap aıtqanda, tómen, tipti óte tómen temperatýrada jetkizý kún tártibinde turǵan negizgi máseleniń biri.

«COVID-19-dyń saldarynan qatty muzdatylǵan dári-dármekterdi tasymaldaýmen betpe-bet keletin logıs­tıka salasy úshin óte kúrdeli mindet», deıdi DHL kompanııasynyń menedjeri Tomas Elman.

Bul eń aldymen germanııalyq BioNTech kompanııasy men onyń amerıkalyq seriktesi Pfizer-diń vaksınasyna qatysty. Sebebi ony mınýs 70 gradýs temperatýrada saqtaý kerek. Atalǵan vaksınany tosyp otyrǵan elder az emes. Sondyqtan joǵarydaǵy eki kompanııa da Qurama Shtattarǵa shuǵyl tirkelýge ótinish jiberip, jeltoqsannyń sońynda Amerıkada ekpeni salý naýqany bastalýy ábden múmkin. Eýropalyq odaq osy dáriniń 300 mln dozasyn jetkizý týraly kelisimge qol qoısa, AQSh 600 mln dozany alyp úlgerdi. Tutastaı alǵanda, eki kompanııa kelesi jyly shamamen 1,3 mlrd vaksınany shyǵarýdy josparlap otyr. Sol sebepti logıstıkalyq uıym­dar­dyń aldaǵy tájirıbesinde atal­ǵan kompanııalar eń kúrdeli klıent­terdiń biri bolýy múmkin.

DHL bul naýqanǵa jazdan beri daıyndala bastady. О́ıtkeni kompanııa klınıkalyq synaqtardan ótip jatqan vaksınalardyń bireýin erekshe jaǵdaıda tasymaldaý qajet ekenin der kezinde túsindi. Buǵan qyrkúıekte McKinsey halyqaralyq konsaltıngtik kompanııasymen birlesip jarııalanǵan zertteý dálel. Onda temperatýraǵa sezimtal dári-dármekterdi tasymaldaýdy qamtamasyz etýge baılanysty usynystar qarastyrylyp, arnaıy tońazytqyshtar men termobokstarda vaksınalardyń 15 mln danasyn jetkizý jóninde aıtylǵan.

Deutsche Post DHL men shveı­sarııalyq Kühne + Nagel kompanııasy COVID-19-ǵa qarsy vaksınalardy tasymaldaýǵa qatysty alǵashqy kelisimshart jasaǵandaryn habarlap, biraq tolyq málimetti ázirge jarııalamaı otyr. Sol sekildi bul baǵytta Qurama Shtattardan bólek Eýropada da mańyzdy róldi amerıkalyq FedEx jáne UPS logıstıkalyq kompanııalary atqarmaq.