Qarapaıym ǵana 19 mıllıonnyń birimin. Týǵan-týysqandarym men et jaqyndarymdy aıtpaǵanda, kindik qanym tamǵan týǵan jerimdi, ósken aýylymdy, ózim turyp jatqan qalamdy, Otanymdy súıemin. Taǵy neni súıemin? Týǵan halqymdy, ana tilimdi, qazaqtyń ulttyq bolmysyn, dástúri men mádenıetin jáne basqa da tolyp jatqan ulttyq qundylyqtaryn súıemin. Qımas qadirlesime aınalǵan, qınalǵanda, qýanǵanda qasymnan tabylǵan dostarymdy, qurby-qurdastarymdy, aýzymnan shyqqan sózdi aqıqat esebinde qabyldap, rııasyz senetin ózimnen kishilerdi, bar meıirin tógip kópke tilekshi bolar úlkenderdi súıemin. Kóp. Jalǵastyra berýge bolady. Oılap otyrsam, osylardyń barlyǵyn Otanymnan esh bólýge bolmaıdy eken. Sonda eń qasıetti, eń qadirli sezim de Otanǵa arnalyp, onyń ıgiligine, búgini men erteńine baǵyttalýy tıis qoı.
Men úshin eń qasıetsiz jan – Otanyn oılaı almaǵan, qara basynyń qamy úshin joǵarydaǵy qundylyqtardyń bárin ysyryp tastaǵan toǵyshar pende, kisi aıaǵandaı paqyr. Sol jolda ol ótirik aıtyp, jalǵan kýálik te beredi, qııanatty ózi jasamasa da kórip turyp úndemeı qalady, eliniń, halqynyń ıgiligine, bolashaǵyna qajettini bas paıdasy úshin ózgege satyp ta jibere alady. Týǵan tilin jyǵyp, týǵan jerin jalǵa «biraz jylǵa paıdalanýǵa ǵana ǵoı» dep ózin ótirik jubatyp, jaqaýratyp, aldarqatyp jatqa taptatýǵa beredi. О́ıtkeni ondaǵy Otan degende júregin julyp berer qasıetti sezimi shalajansar nemese ólip qalǵan. Otanyma zııany keletin bolsa, óz basymnyń baılyǵy men amandyǵy qajet emes deı almaıdy.
Sosyn neni súıemin? О́mirdi, ıá, ómirdi súıemin. Jan tátti me? Iá, jan tátti bolýy kerek. Alaıda sol jandy bergen Alla emes pe? Endeshe jan da meniń menshigim emes. Al men oǵan kir juqtyryp alsam, birdeńesine aqaý keltirip búldirgen bolsam, tazalap turýǵa umtylmasam, bylǵap alsam tánimnen janym jırenip, tastap ketip, aıyrylysý arty kórmesteı arazdyqqa aparsa qaıtemin deımin. Aqyrette jolyqtyrmaı qalýdan qorqady ekenmin. Sondyqtan janym men tánim arasyndaǵy úndestik úzilmeı, rýh pen bolmys arasyndaǵy baılanys jymdasqanyn qalaımyn.
Neni unatpaımyn? Adamdardyń uǵyspaı júrgenin unatpaımyn. Eger aralarynda keshpesteı, jazasyn tartar aýyr qylmys, kisi ólimi bolmasa, keshirimmen qarap, eń bolmaǵanda sen de aman júr dep beıbit qoshtasýǵa kúsh tabý kerek dep oılaımyn. О́ıtkeni ómir qyp-qysqa. Pendeler arasynda túsinbestiktiń týýyna árkez sebep tabylady, tipti izgi maqsatty oıdyń ózin sol kezeńdegi emosııamen uǵynbaı, keıin jyldar óte túsinýi múmkin. Biraq oǵan ýaqyt pen shydam kerek. Jaýlasý kimniń de qolynan keledi, al túsine bilýdi, uǵyna bilýdi ekiniń biri jasaı almaıdy. Osy ómirde ózimniń boıymda osy úlken keshirimdi aıalap, óltirip almaıyn dep keledi ekenmin.
Máshhúr Júsip Kópeıuly: «Bireý kedeı bolsa, «Qudaı kedeı qyldy», bireý jaman bolsa, «Qudaı jaman qyldy», bireý nadan bolsa, «qaıtsin, Qudaı nadan qyldy» deý, mundaı sózder Qudaıdy jamandaǵan bolady. Ne tapsa, árkim óz pıǵylynan, óz kásibinen tappaq. Qudaı eshkimdi zorlyqpen kedeı qylmaıdy, eshkimdi zorlyqpen jaman qylmaıdy, eshkimdi zorlyqpen nadan qylmaıdy. Qudaı bermeıtuǵyn sarań emes, saqtaı almaıtyn osal emes. Ne kemshilik bolsa, pendeniń óz peıilinen, óz osaldyǵynan» deıdi. Endeshe bermeıtuǵyn sarań emes, qudaıdan tarylmaıtyn darhan peıildi tileıik. Saqtaı almaıtyn osal emes, Qudaıdan Táýelsizdiktiń myńjyldyqtarǵa keter ǵumyryn saqtaýdy tileıik.
Jaratýshy ıe qazaqqa tereńine deıin kenge tolǵan keń jer berip jarylqap, «Elim meniń, jerim meniń» dep ən aıtqyzdy. Túbi «Eliń seniń, jeriń seniń» deıtin etpesin. Qudireti sheksiz Alla taǵalanyń kózi túzý bolsyn. Amanatqa qalǵan jerdi urpaqqa amanattaýdy jazsyn! «Qudaısyz qýraı synbaıdy» deıdi qazaq. Árbir pendeniń peshenesine taǵdyr jazyp qoıǵanda jer taǵdyryn, ult taǵdyryn pendeniń qolyna berip qoıa ma?! Nyǵmet ıesi Alla jar bolsyn! Allaǵa jaǵar amaldyń biri – taza amal, taza nıet. Endeshe adam balasynyń birine biri rııasyz, aq-adal tilektestikpen qoldaýyn sezinýdiń uly kúsh ekenin sezinýge, túısinýge shaqyramyn. Ol shynymen Qudaıǵa jaǵatyn amal bolǵandyqtan, qudiretti de, qýatty. Adamdardyń aq-adal tileginiń bir jerden shyǵýy eshqashan jerde qalǵan emes! Kóp tileginiń qýaty – uly qorǵan. Elimiz aman, Otanymyz irgeli, tilimiz máńgi ǵumyrly, ár otbasy baqytty, urpaqtary sanaly bolsyn!
