Alty bala tárbıelep ósirgen Jumaqanovtardyń úıi áne-mine qulaǵaly turǵanymen, táýelsiz sarapshylardyń «apattyq jaǵdaıda» dep tanyp, bergen aktileri joq. О́zderi jadaý úıdiń jaı-japsaryn aıtyp, ákimdiktiń tabaldyryǵyn tozdyrǵaly qashan?! Kómek bolsa, qanekı... Osyndaıda «aspannan kıiz jaýsa da kedeıge ultaraq buıyrmaıdy» degen mátel eriksiz eske túsedi. Áıtpese, mereke saıyn kilt ustap sýretke túsip jatqan kóp balaly analardyń qatary az emes.
– Aýdan ákimniń orynbasary Álibek Baıjumanov kelip, eshqandaı kómek bolmaıtynyn aıtty. Úıdi ózderiń jóndep alyńdar nemese Halyqqa qyzmet kórsetý ortalyǵyna baryp tirkelińder dedi. Tirkelýin tirkelemiz ǵoı, biraq úı apattyq jaǵdaıda degen qaǵaz joq. 2017 jyly ótinish bergemiz, onyń ýaqyty ótip ketti. Ákimdikke bir emes, birneshe ret bardyq. Esh qaıyr bolmady, – deıdi alty balanyń anasy Gúlnaz Turlyqova.
Balalarynyń úsheýi kámelettik jasqa tolmaǵan, mektepte oqıdy. Al Gúlnazdyń ózi – aýyldaǵy Halyq bankiniń fılıalynda eden jýýshy. Alatyn aılyǵy – 13 myń teńge. Kúıeýi Ermak Jumaqanov vahtalyq ádispen jumys isteıdi. Bir aı jumysta bolsa, bir aı úıde. Aılyǵy – 60 myń teńge. Onyń ózi eki aıda bir kiretin kiris. Ustap otyrǵan maly da joq.
G.Turlyqovanyń aıtýynsha, bul úıde kezinde ata-enesi turǵan. Aıadaı ǵana eki bólmeli qara shańyraqty keńeıtýge, jóndeýge jaǵdaılary joq. Tapqan-taıanǵandary bala-shaǵasynan aspaıdy. Eger oblys ortalyǵynan komıssııa kelip, baspanalaryna saraptama jasaıtyn bolsa, qoǵam belsendisi, Tarbaǵataıdyń týmasy Ásel Merjaqyp zańdylyq jaǵyn nazarynda ustap otyratynyn aıtty.
– Turyp jatqan úıleriniń jaǵdaıy óte nashar. Mán-jaıdy jaqsy bilip otyrmyn. Kómek berýge laıyqty otbasylar. Balalary da tárbıeli. О́zderi eshkimnen alaqan jaıyp kómek suramaıdy, – deıdi Ásel Merjaqyp.
Resmı derekterge súıensek, bıyl Aqjar aýylynda ǵana 26 páter qoldanysqa berilgen. Onyń 14-i kóp balaly otbasylarǵa berilse, 6-y áleýmettik osal toptaǵylarǵa buıyrdy. Al qalǵan 6 úı baspanalary apattyq jaǵdaıda turǵan azamattarǵa berildi. Onyń bári 21 adamnan turatyn aýdandyq komıssııanyń qadaǵalaýynda boldy. Komıssııa quramynda kóp balaly analar, okrýg ákimi janyndaǵy qaýymdastyqtyń alty múshesi, kommýnaldyq sharýashylyqtyń, «Altaıenergııanyń» dırektorlary bolǵan eken. Biz de toqal tamda turyp jatqan G.Turlyqovanyń máselesin alǵa tartyp, aýdan basshylyǵyna, okrýg ákimine habarlasqan edik.
– Aqjardaǵy úılerdiń 80 paıyzy 50-60 jyldary salynǵan. Onyń ishinde apattyq jaǵdaıda turǵandary kóp. G.Turlyqova «úıim apattyq jaǵdaıda tur» dep 2016 jyly Halyqqa qyzmet kórsetý bólimshesine baryp tirkelýi kerek bolǵan. Sodan keıin táýelsiz sarapshylar úıdiń jaǵdaıyn anyqtar edi. Byltyr kóp balaly otbasylarǵa 9 úı bergenbiz. Bıyl 6 otbasy bas tartty. Sebebi Aqjardan beriletin úı arendalyq bolǵan soń aı saıyn 13 myń teńge tóleýi tıis. Jylyna shaqqanda – 156 myń teńgedeı. Sonymen qatar balalary 10-11 oqıtyn ata-analar páterdi «Turǵynúıqurylysjınaqbanki» arqyly qaladan alǵylary keledi. Bári sátimen bolsa, keler jylǵa 30 úı kóterýdi josparlap otyrmyz. Sonymen másele sheshilip qalatyn sııaqty. Jeke kásipker 30 páterli 15 úı salýdy kózdep otyr. Baspana kezekpen ǵana beriledi, – deıdi Aqjar aýyldyq okrýginiń ákimi Asqar Boǵyrbaev.
Iá, jospar oıdaǵydaı bolsa, keler jyly Aqjarda 60 otbasy qonys toıyn toılamaq. Al Jumaqanovtar otbasy bul tizimge enýi úshin Halyqqa qyzmet kórsetý fılıalyna baryp, úıdiń jaǵdaıyn esepke ilindirýi tıis. Sodan soń táýelsiz sarapshylar úıdiń kúıine baılanysty sheshim shyǵaryp, jańa úıge qol jetkizýge jol ashatyn kórinedi.
Shyǵys Qazaqstan oblysy,
Tarbaǵataı aýdany
