Qabyldanǵan jedel sharalarǵa qaramastan oblys aýmaǵynda koronavırýstyń 4 532 jaǵdaıy tirkelip otyr. Alaıda ınfeksııalyq stasıonardan 4 232 azamat saýyǵyp shyqqan bolsa, ókinishke qaraı 61 naýqas qaıtys bolǵan. Eń birinshi kezekte adamnyń ómiri asa qundy ekenin eskersek, bul az shyǵyn emes. Jambyl oblystyq densaýlyq saqtaý basqarmasynyń basshysy Áset Qalıevtiń aıtýynsha, bir aptanyń ishinde óńirde koronavırýs indetin juqtyrýdyń 110 deregi anyqtalypty.
«Qazirgi tańda oblysta koronavırýs ınfeksııasyna polımerazdy tizbekti reaksııa júrgizý arqyly testileý 9 zerthanada ótkiziledi. Jalpy, oblys boıynsha táýliktik qýat 2 740-ty qurap otyr. Sonymen qatar ınfeksııaǵa polımerazdy tizbekti reaksııa júrgizý arqyly testileýdiń kólemin ulǵaıtý maqsatynda oblystaǵy emdeý, aldyn alý uıymdarynda aptasyna 9 myń testileý ótkizý tapsyryldy», deıdi ol. Elimizdegi «Qyzyl aımaqqa» engen birqatar oblys jáne qalalardaǵy ahýal búginde turaqtalyp keledi. Bul másele boıynsha da tıisti sharalar qabyldanyp, jumystar júrgizilgen. Alaıda Jambyl oblysynda tótenshe jaǵdaı rejimi toqtatylǵannan keıin, barlyq karantın sharalary bosańsyp ketken. Shynynda da qazir qala kóshelerinen medısınalyq betperde taǵyp júrgen adamdardy kezdestirý qıyn. Budan bólek, adamdar kóp shoǵyrlanatyn meıramhana sııaqty qoǵamdyq oryndar men qoǵamdyq kólikterdiń jumysy taǵy bar. Saldarynan oblys ortalyǵy men birqatar aýdanda qaıtadan indet órshı bastady. Oblys ákimi Berdibek Saparbaev ta bul rette monıtorıngtik toptardyń jumysynyń óte nashar ekenin, tártipke baǵynbaǵandarǵa qatań jaza qoldaný qajettigin, qoǵamdyq kólikterdiń jumysyn da baqylaýǵa alý keregin aıtqan bolatyn. Shynynda da, qazir qala ishinde júrip jatqan qoǵamdyq kólikterdiń jumysyna rettilik kerek bolyp tur. Máselen, jıyrma oryndyq kólik bolsa, oǵan otyz, qyryq shaqty adam minip alady. Bul da qaýipti indettiń qaıta órshýine ákelip soǵýy múmkin jaǵdaılar. Sonymen qatar óńirde sońǵy aılarda dezınfeksııa jumystary múldem umytylǵan. Jaýapty mekeme basshylarynyń sózine sensek, bári de saqadaı-saı, keremet. Biraq naqty is júzinde olaı bolmaı otyr. Tapsyrma berilgenimen, onyń oryndalýy oıdaǵydaı emes.
Birqatar aýdandarmen qatar, Taraz qalasynda da qaýipti indettiń qaıta órshı bastaǵanyn aıttyq. Bul kúnde oblys ortalyǵynyń ózinde 300 myńnan astam halyq bar. Jýyrda ǵana Taraz qalasynyń ákimdigi shahardaǵy qoǵamdyq oryndarǵa reıd júrgizip, indet juqtyrýy múmkin birqatar jaǵdaıdy anyqtady. Máselen, «Dámdes» sýpermarketi sııaqty iri saýda oryndary men ózge de dúkenderdegi, «DISKOVERY», «Izıým» dámdi palaý» syndy birqatar tamaqtaný oryndarynda da daıashylardyń kelýshilerge karantın talaptaryn saqtamaı qyzmet kórsetkeni anyqtalǵan. Kelýshiler de bul talaptardy saqtamaǵan. Bul rette Taraz qalasynyń bas memlekettik sanıtarlyq dárigeri Rıta Altynbasovanyń aıtýynsha, jyl basynan beri qalada 1 990 adam indet juqtyrǵan. Sońǵy kezde jaǵdaı birshama turaqtalǵanymen, qarasha aıynan bastap indet juqtyrý deregi qaıta órshigen. Koronavırýs saldarynan sońǵy eki aptanyń ózinde Taraz qalasynda 11 adam qaıtys bolǵan. Sondyqtan da jaǵdaı kúrdeli bolyp tur.
Endi jergilikti turǵyndardyń kókeıinde oblystaǵy karantın talaptary qaıtadan kúsheıtile me degen saýaldyń bar ekeni anyq. Eki adamnyń basy qosylǵan jerde de osy másele talqyǵa túsedi. Degenmen, bir aptanyń ishinde óńirde epıdemııalyq jaǵdaı turaqtalmasa, shekteý sharalary qaıtadan kúsheıtiletin bolady.
Jambyl oblysy
