«Azyq-túlik qaýipsizdigi máselesi – basty nazarda. Biz áleýmettik mańyzdaǵy azyq-túliktiń baǵasyn turaqtandyrý úshin birqatar sharalardy júzege asyrdyq. Saýda jelilerine "aınalym mehanızmi" boıynsha bólinetin somany 13 eseden astam - 180 mln teńgeden 2,4 mlrd teńgege deıin ósirdik. Bul áreketimiz áleýmettik mańyzdy taýarlardyń 16 túrine ustap turýǵa múmkindik berdi. Sonymen birge, satyp alýdy ulǵaıttyq jáne baǵany turaqtandyrýǵa qatysatyn saýda jelileriniń sanyn 4-ten 12-ge kóbeıttik. Olar: Magným, Astyqjan, Kenmart, Vkýsmart, A2, Metro, Anvar, Rahmet, Aqmol, Smoll, "Astanalyq" bazary, Shapaǵat.
Sonymen birge, sharýa qojalyqtarymen qosymsha - 704 mln teńgege 5 myń tonna kókónis satyp alýǵa forvardtyq kelisim jasadyq. Nan ónimderine baǵany turaqtandyrýǵa jergilikti naýbaıhanalarǵa 600 mln teńgede asa qarjy bóldik. Bul sharalar áleýmettik mańyzdaǵy azyq-túlik taýarlaryna baǵany ustap turýǵa kádimgideı kómektesti.
Birqatar iri saýda jelileri men taýar óndirýshilerdiń basshylyǵymen kezdesý kezinde osyndaı áriptestikti ári qaraı jalǵastyrý jaǵyn talqyladyq. Saýda jelilerine "aınalym mehanızmi" boıynsha bólinetin somany 2021 jyldan bastap ulǵaıtýdy tapsyrdym.
Elordada barlyǵy 7 logıstıkalyq keshen bar, 4 kóterme-taratý ortalyǵynyń qurylysy júrip jatyr (úsheýi - jeke ınvestorlardyń esebinen). Investorlar sonymen birge - jylyjaılar, azyq-túlik bazarlaryn, kókónis qoımalaryn, sút zaýytyn jáne t.b. nysandardy salý jónindegi jeke jobalardy qoldap otyr. Bul sharalar da azyq-túlik qaýipsizdigin nyǵaıta túsip, naryqty jergilikti taýarlarmen toltyrýǵa muryndyq bolady», – dep jazdy Altaı Kólginov.
