Mýzeı el halqyna, týrısterge, sheteldik qonaqtarǵa Qazaqstannyń jer asty baılyǵyn tanystyryp, aǵartý jumysyn júrgizý maqsatynda ashylǵan. Budan bólek, oqýshylar men stýdentter mýzeıden ózderiniń zertteý jumystaryna qajetti materıaldar ala alady.
Maǵzum Myrzaǵalıevtiń sózinshe, mýzeıdi geolog mamandyǵyn nasıhattaý úshin oqytý-aǵartý ortalyǵy retinde odan ári damytý qajet.
«О́zderińizge belgili, geologııa salasynda ınjener kadrlardyń tapshylyǵy bar. Osyǵan baılanysty mýzeı bazasynda Jer týraly Ǵylymı ortalyq ashý kerek. Onda sala úshin kadrlyq rezerv daıyndalyp, jas geologtarǵa, salalyq JOO-lardyń stýdentterine, jas mamandarǵa kásibı orta qalyptasady. Sonymen birge oqýshylardyń nazaryn geoekologııa men jer qoınaýy problemalaryna aýdarýǵa bolady», - dep atap ótti mınıstr.
Sonymen qatar mınıstr mýzeı tek geologııalyq uıymdar arasynda mańyzdy oryn alyp qana qoımaı, qalanyń «vızıttik kartasyna» aınalatynyna senim bildirdi.
«Mýzeıde geologııa salasynyń máseleleri qamtıtyn taqyryptyq ekskýrsııalar da ótkizip turý kerek»,- dep aıtty mınıstr.
Ashylý saltanatynda mýzeı jetekshisi, Qazaqstannyń eńbek sińirgen geology Oljabaı Ismaılov munda Qazaqstannan bólek, Eýropa, Afrıka, Ońtústik Amerıka, Avstralııa memleketterinen jınalǵan eksponattar bar ekenin atap ótti.
«Kolleksııalyq úlgilerdiń birazyn geolog-áriptesterimiz qaıtarymsyz bizge berdi. Mýzeı qory udaıy jańaryp, jańa dúnıeler túsip turady. Sońǵy jyldary kolleksııanyń tek ǵylymı emes, estetıkalyq qundylyǵyna da nazar aýdarylýda», - dep atap ótti ol.
Qazirgi ýaqytta mýzeıde mıneralogııalyq jáne paleontogııalyq kolleksııa, 19-20-ǵasyrlardaǵy geologııalyq ádebıet basylymdary, buryn qoldanylǵan geologııalyq quraldar, zamanaýı faýnıstıkalyq qaldyqtar ornalasqan. Ekpozııasııada krıstaldardyń, qundy mıneraldardyń, paleontologııalyq qaldyqtardyń krıstall úlgileri bar. Mysaly, saf altyn, kúmis, temir, jubarjat, evdıalıt, ametıst, ızýmrýd, topaz, tanzanıt, charoıt, nefelın, mıneraldanǵan aǵash jáne taǵy basqalaryn erekshe atap ótýge bolady. Mýzeıdegi jalpy eksponattar sany – 750 danany quraıdy.
