Oblys ákimi Mahambet Dosmuhambetovtiń málimetinshe, bul bilim uıasynda 831 oqýshy dáris alady. Olar osy kezge deıin ózge mektepterde oqyǵan.
Úsh qabatty mektep ǵımaratynda 200 oryndyq akt zaly men 130 orynǵa arnalǵan ashana, jańa úlgidegi psıhologııa kabıneti men medısınalyq pýnkt bar. Jańa bilim oshaǵy zamanaýı qural-jabdyqtarmen qamtamasyz etilgen.
«Elimiz táýelsizdik alǵannan beri bilim berý salasyna aıryqsha kóńil bólindi. О́ıtkeni básekege qabiletti qýatty memleket qurý úshin bilimdi urpaq tárbıeleý kerek. Sol sebepten muǵalimder mártebesi kótirilip, jyl saıyn jalaqysy ósip otyr. Mektepterdiń materıaldyq-tehnıkalyq bazasy turaqty jańartylyp keledi. Atyraý qalasynda 1991 jyldan beri 23 mektep salyndy. Bıyl eki mektep paıdalanýǵa berildi. Al úsh mektepte kúrdeli jóndeý jumystary aıaqtalyp, ekeýinde jalǵasyp jatyr» dedi óńir basshysy Mahambet Dosmuhambetov.
Ákimniń aıtýynsha, «Bereke» shaǵyn aýdanynda 1200, al Damby aýylynda 300 oryndyq jańa mektep salynyp jatyr. Kelesi jyly Jańatalap aýylynda 300, «Balaýsa» shaǵyn aýdanynda 600, Aqjar-2 aýylynda 600 oqýshyǵa arnalǵan mektep paıdalanýǵa beriledi. Tórt mekteptiń janynan qosymsha 120 orynǵa eseptelgen japsarjaı salyndy. Sondaı-aq ǵımaraty apatty jaǵdaıda dep tanylǵan M.Jumabaev atyndaǵy orta mektep úshin 160 oryndyq jańa nysan salý josparlanyp otyr.
«Munyń barlyǵy Táýelsizdiktiń tiregi – jas býynnyń sapaly bilim alýy úshin jasalǵan qadam. О́ıtkeni sapaly bilim ǵana sanaly urpaqtyń qalyptasýyna yqpal etedi. Osy maqsatta Nazarbaev zııatkerlik mektebimen birlese arnaıy jol kartasyn daıyndalyp jatyr» dedi oblys ákimi.
