Jer jahandy sharlaǵan koronavırýstyń kesirinen sporttyq saıystardyń barlyǵy da belgilengen ýaqytynda ótpeı qalǵany belgili. Solardyń qatarynda Olımpııa oıyndary men Paralımpıada da bar. Bıyl jalaýy jelbireýge tıis aıtýly jarystar kelesi jylǵa shegerildi. Osyndaı qolaısyzdyqtardyń saldarynan Japonııaǵa taǵy ta biraz shyǵyndanýyna týra keledi.
Endi olar baıraqty básekelerdi joǵary deńgeıde uıymdastyrýǵa qajetti qarjy mólsherin birshama kóbeıtýdi qup kórip otyr. Tarqatyp aıtsaq, sporttyq nysandar men Olımpıada qalashyǵyn jetildirýge 2,85 mıllıard, koronavırýstiń aldyn-alý sharalaryna 931 mıllıon, jarystyń ashylý men jabylý rásimderine 931 mıllıon dollar jumsalý kózdelýde. Jarysqa qajetti jalpy sommanyń 6,97 mıllıardyn uıymdastyrý komıteti men 6,787 mıllıardyn Tokıo bıligi japsa, qalǵan qarajat Japonııanyń bıýdjeti esebinen jumsalady.
Sonymen qatar, marafon men sporttyq júris jarystarynyń Tokıodan Sapporo qalasyna aýystyrylýyna baılanysty Halyqaralyq Olımpıada komıteti (HOK) tarapynan qosymsha 193 mıllıon dollar bólinedi.
Esterińizge sala keteıik, Olımpııa oıyndary 2021 jyldyń 23 shildesi men 8 tamyzy aralyǵynda ótse, Paralımpıada 24 tamyz ben 5 qyrkúıek aralyǵynda uıymdastyrylady.
