Qus fabrıkasy keńeıtýden keıin Ortalyq Azııadaǵy taýyq etin óndirý kólemi boıynsha iri kásiporynǵa aınaldy. Saǵatyna 9 myń broılerdi qaıta óńdeý qýattylyǵy qus etin óndirýdi jylyna 25 myń tonnadan 60 myń tonnaǵa deıin arttyrýǵa, Qazaqstannyń ishki naryǵynyń qajettiligin 22%-ǵa deıin qamtamasyz etýge jáne ónim ımporty úlesin 42%-dan 33%-ǵa deıin qysqartýǵa múmkindik beredi. 2-kezekti iske qosqannan keıin kásiporyndaǵy turaqty jumys oryndarynyń sany 800-den 1370 adamǵa deıin artty.
Makınsk qus fabrıkasy — qus etin óndirý jáne qaıta óńdeý salasyndaǵy QR iri ınvestısııalyq jobasy. Kásiporynnyń 1 jáne 2-kezektegi ınvestısııalarynyń jalpy kólemi 48,5 mlrd teńgeden asty. 3-kezektiń qurylysy boıynsha josparlardy iske asyrý 2023 jyly kásiporynnyń qýatyn jylyna 100 myń tonna qus etine deıin arttyrady, bul ósimdik sharýashylyǵyn damytýdy jáne irgeles salalarda jumys oryndaryn qurýdy yntalandyrady. Keńeıtý jobasy aıasynda 40 mlrd teńgeden astam ınvestısııa tartylady.
Makınsk qus fabrıkasy «Aitas» holdınginiń quramyna kiredi. Holdıng strategııasyna sáıkes, 2030 jylǵa deıin 350 mlrd teńgege jýyq ınvestısııamen jylyna 350 myń tonnaǵa deıin et ónimderin óndirý kólemin arttyrý kózdelip otyr. «2024 jylǵa qaraı biz ishki naryqty otandyq óndiristiń negizgi azyq-túligimen, onyń ishinde qus etimen tolyq qamtamasyz etýimiz kerek. Makınsk qus fabrıkasynyń óndiristik qýatyn odan ári keńeıtý Qazaqstannyń azyq-túlik qaýipsizdigin nyǵaıtady», — dedi A. Mamın. Premer-Mınıstr «Makınsk qus fabrıkasy» JShS qurama jem óndiretin zaýyttyń jumysyn bastap berdi. Jobanyń quny – 4,7 mlrd teńge, jobalyq qýaty – jylyna 150 myń tonna.
Aldaǵy jyldary respýblıkada jalpy qýattylyǵy jylyna 175 myń tonna ónim shyǵaratyn 12 jańa qus fabrıkasy jumys isteı bastaıdy. Bul qus etiniń ımportyn almastyrý máselelerin tolyq sheshýge jol ashady. Sondaı-aq A. Mamın «Makınsk jylý oqshaýlaý zaýyty» JShS jylý oqshaýlaǵysh materıaldaryn shyǵaratyn zaýytqa jáne Jumyspen qamtýdyń jol kartasy-2020 aıasynda salynǵan Makınsk qalasyndaǵy modýldik qazandyqqa bardy.
2020 jyldyń 11 aıynyń qorytyndysy boıynsha Aqmola oblysynda ónerkásiptik ónim óndirisiniń kólemi 928,6 mlrd teńgeni qurady, bul ótken jylǵy kezeńdegi kórsetkishten 6,6%-ǵa joǵary, aýyl sharýashylyǵyndaǵy jalpy ónim kólemi – 653,8 mlrd teńge (+12,7%).
