Jyl saıyn ozattarǵa «Úzdik jastar premııasyn» berý dástúrge aınalǵan. Bıylǵy shara osymen onynshy ret uıymdastyrylyp otyr. Búgin el Táýelsizdiginiń 29 jyldyǵyna oraı 29 nomınasııa boıynsha úzdik dep tanyldy.
Qala ákiminiń «Úzdik jastar-2020» premııasynyń erejesine sáıkes, 14-29 aralyǵyndaǵy 175 jas baıqaýǵa qatysyp, komıssııanyń sheshimi boıynsha 29 jas óz salasynda «Úzdik» dep tanyldy.
Saltanatty jıynda sóz alǵan Murat Dúısenbekuly óz salasynyń naǵyz sheberlerin jeńisimen quttyqtap, shyǵarmashylyq tabys tiledi.
«Túrli salada ózin kórsetken daryndy jastarǵa qoldaý kórsetý, jetistikterin nasıhattaý, jastardyń rýhyn kóterip yntalandyrý maqsatynda bıylǵy jyly dástúrli 10-shy ret «Úzdik jastar» premııasyn ótkizip otyrmyz. Merekeni osyndaı sharamen bastaǵanymyz beker emes. Sebebi Shymkent – jastardyń qalasy. Qala turǵyndarynyń basym bóligi jastar. Jas býyn qashan da el nazarynda. Elge qyzmet etý tek bilimdi ǵana emes, namysty da talap etedi. Jas urpaqtyń ar-namysy joǵary bolsa, memleketimizdiń mártebesi bıik bolady. Sizderdi búgingi jeńisterińizben quttyqtaımyn! Elimizdiń erteńi – ózderińiz!» dedi qala ákimi.
Búginde Shymkent qalasynda 239 myńnan astam jas bolsa, ol qala turǵyndarynyń 23 paıyzyn qurap otyr. Joǵary jáne orta arnaýly oqý oryndarynda 117 728 jas bilim alatyn bolsa onyń ishinde 57 myńnan astamy talantty, daryndy jáne shyǵarmashyl jastar. Sonymen qatar, 37 jastar qoǵamdyq birlestikteri Memlekettik jastar saıasatyn júzege asyrýǵa óz úlesin qosyp keledi.
