«Shatılo ı K» JShS Soltústik Qazaqstan oblysyndaǵy Jambyl aýdanyndaǵy Kazanka selosynda uıymdastyrylǵan. Aýdan ortalyǵy Presnov selosynda onyń astyq qabyldaý pýnkti bar. Oqıǵa osy pýnktte oryn aldy.
Túngi kezekshiliktegi aýdandyq polısııa qyzmetkerleri osy kásiporynda jeti túnde shamdaryn sóndirip, astyq artyq artyp jatqan segiz «KamAZ» avtokóligin baıqap qalady. Tún jamylyp ári shamdaryn sóndirip astyq artyp jatqandar birden kúdik týdyryp, polısııa qyzmetkerleri olardan qujattaryn kórsetýdi talap etken. Sóıtse, bular shynynda da eshqandaı ruqsatsyz astyq artyp jatqandar bolyp shyǵady. Eger osynsha kólik tirkemelerimen tolyq toltyrylǵanda 160 tonnadaı astyq artylǵan bolar edi. Biraq polısııa qyzmetkerleri astyqtyń zańsyz artylyp jatqanyn toqtatyp, tek 80 tonna qoldy bolǵaly turǵan jerinde ustaǵan.
Tún jamylyp astyqty basqa jaqqa jóneltkeli jatqan sol kásiporyn basshylarynyń biri bolyp shyqty. Qazir ol kúdikti retinde ustalyp, ýaqytsha qamaý ornyna toǵytyldy. Úshinshi klasty bıdaıdyń bir tonnasynyń baǵasy bıyl 200 dollardan asyp ketkenin eskersek urlyqtyń qarajat kólemi orasan zor bolyp shyqqany túsinikti.
Qazir Jambyl aýdanynyń PB qyzmetkerleri asa iri mólsherde astyq urlaý faktisi boıynsha sotqa deıingi tergeý júrgizýde. Keltirilgen shyǵyn somasy 23 mıllıon teńgeden astam ekeni anyqtalyp otyr. Qazirgi tańda qylmysqa basqa da adamdardyń qatystylyǵy tekserilýde.
Osy ýaqytqa deıingi tergeý jumystary jańa astyq óniminiń birinshi partııasy jeltoqsan aıynyń basynda urlanǵanyn anyqtady. Ol joly 190 tonnadan astam astyq Aqmola oblysynyń bir elevatoryna jetkizilgen.
Qazir qasqyrǵa qoı baqqyzǵandaı bolǵan kompanııa basshylary ózderi senim bildirgen adamnan zalal shegip, ókinishte qalyp otyr. Árıne, sonsha kólemdegi dúnıeni jitirý úshin uıymdasqan top qurylǵany da anyq. Tergeý barysynda olar anyqtalatyn shyǵar degen úmit bar. «Tergeý áreketteri barysynda urlanǵan ónimdi satý orny da anyqtaldy. Kúdiktiniń úıinen konvertterge salynǵan asa iri kólemdegi aqsha da tabyldy. Qylmystyq áreketti tergeý QK 188-baby júrgizilýde. Tárkilengen «KamAZ» avtokólikteri men qujattama da tekserilýde», - deıdi Jambyl aýdanynyń PB bastyǵy polısııa polkovnıgi Asan Meıramov.
Aıta ketetin jaıt, bul qylmysty tergeý barysy SQO PD bastyǵy men oblystyq prokýratýranyń baqylaýynda.
Soltústik Qazaqstan oblysy
