Vırýstyń jańa shtamy jaıyndaǵy aqparat 14 jeltoqsanda shyǵa bastady. Eldiń premer-mınıstri Borıs Djonson 20 jeltoqsanda Londonda, Shyǵys, Ońtústik Shyǵys jáne Ýels aımaqtarynda lokdaýn jarııa etisimen Eýropanyń birqatar memleketi Ulybrıtanııamen aradaǵy barys-keliske shekteý qoıa bastady. Atap aıtqanda, Germanııa densaýlyq saqtaý isiniń basshysy Iens Shpan Ulybrıtanııadan dúısenbi kúni, ıaǵnı 21 jeltoqsannan bastap áýe baılanysynyń toqtaıtynyn habarlasa, Fransııa 48 saǵatqa Birikken Koroldikten jolaýshy jáne júk tasymalyn doǵara turýdy sheshken.
Sonymen qatar Nıderland memleketi áýe jáne temirjol qatynasyn jańa jyldyń basyna deıin úzetinin málimdep, Italııa úkimeti de aralǵa sońǵy eki apta ishinde barǵan óz azamattaryna elge qaıta kirýdi keıin shegerý qajettigin aıtyp, eki aradaǵy áýe baılanysynyń toqtatylatynyn habarlady. Belgııa koroldigi de etek-jeńin qymtap, Ulybrıtanııamen ushaq qatynasyn ázirge toqtatatynyn málimdegen.
Italııadaǵy densaýlyqqa jaýap beretin vedomstvonyń habarlaýynsha, jańa shtamnyń juǵý jyldamdyǵy burynǵydan áldeqaıda joǵary kórinedi. Qaýipti shtamǵa qatysty qadamdardy EO-ǵa múshe elderdiń barlyǵy qabyldap jatyr. Máselen, Estonııa men Latvııa da jyldyń sońyna deıin Ulybrıtanııamen aradaǵy áýe qatynasyn toqtata turmaqshy.
Jańa shtamm EO quramynan bas tartqan Ulybrıtanııany oqshaýlaýda kári qurlyqtaǵy odaqtastar úshin «Qulannyń qasynýyna, myltyq shúrippesiniń basylýyna» saıatyndaı jaqsy bir tetik bolǵanǵa uqsaıdy.
