Soltústiktegi kórshisinen qandaı qaýip keletinin túsingen Fransııa birden shekarany jabý týraly sheshim qabyldaǵan. Buǵan Ulybrıtanııa úkimetiniń COVID-19 indetiniń jańa asa juqpaly túri tabylǵany týraly málimdemesi sebep boldy. Shekarany eshkimdi ótkizbesten, tolyq 48 saǵatqa jabý kerisinshe eki el arasyndaǵy qarbalasty odan saıyn údete tústi. Jolda júk tasıtyn myńdaǵan kólik turyp qalǵan. Onyń kóbi azyq-túlik tasıtynyn eskersek, búlingen ónimniń shyǵyny kásipkerler úshin de ońaı bolmaıyn dep tur. Osynyń barlyǵyn eskergen Fransııa úkimeti qaýipsizdik sharasyn jeńildetip, eki el arasyndaǵy shekarany qaıta ashý týraly sheshim qabyldady. Temir jol, áýe jáne teńiz baılanysy qaıta jandanatyn bolady. Degenmen shekaradan kez kelgen adam óte almaıdy. Fransııa azamattary, Fransııada turatyn brıtan azamattary men júk tasymaldaýshylar koronavırýs juqtyrmaǵanyn dáleldeıtin anyqtama kórsetip qana saıahattaı alady. Qazir áskerıler ulttyq densaýlyq saqtaý qyzmetimen birlese otyryp, jolda turyp qalǵan júk kólikteriniń júrgizýshilerinen indetti anyqtaıtyn jedel test alyp jatqan kórinedi.
Ulybrıtanııadan kelgen saıahatshylardyń jaǵdaıy basqa elderde de máz emes. Nıderland pen Belgııa vırýs juqtyrmaǵany týraly anyqtamasy bar azamattardy ǵana eline kirgizetin boldy. Alaıda ózge 50-den astam el onyń ishinde Italııa, Úndistan jáne Pákistan ulybrıtanııalyq saıahatshylardy múldem qabyldamaıdy. Osylaısha, Eýropada qaýiptiń qaıta kúsheıýine Ulybrıtanııadaǵy jaǵdaı tikeleı sebepker bolyp otyr.
Bul oqıǵa Eýropalyq odaq pen Ulybrıtanııa arasyndaǵy onsyz da shıelenisken jaǵdaıdy qıyndata túsetin sekildi. Shekaranyń jabylýy eń aldymen bızneske salqynyn tıgizbek. Ulybrıtanııalyq azyq-túlik óndirýshiler óz taýaryn satyp alýshy elge ýaqtyly jetkize almaı san soǵyp otyrǵan jaıy bar. Eldegi Azyq-túlik jáne sýsyndar federasııasynyń (FDF) basshysy Ien Raıt shekaradaǵy kidiristerdiń Ulybrıtanııa bıznesine jáne taýar jetkizý qaýipsizdigine áserin zertteý qajet ekenin aıtyp, Parlament palatasynyń bıznes komıtetinde shuǵyl jıyn ótkizý kerektigin alǵa tartyp otyr. Onyń sondaı-aq úkimettiń habar taratqanyna kóńili tolmaıdy. Nátıjesinde, shyǵynǵa ushyraǵan azamattarǵa ótemaqy tóleý qajet deıdi.
Shekaranyń jabylýy brıtandyq óndirýshilerge ǵana kesirin tıgizgen joq. British Retail Consortium (BRC) salalyq tobynyń málimeti boıynsha Ulybrıtanııa turǵyndary tutynatyn taǵamnyń shamamen 30%-y Eýroodaqtan keledi eken. Ásirese jyldyń sýyq mezgilinde jemis-jıdek pen kókónis jaǵynan Ulybrıtanııa ımportqa táýeldi.
Sonymen, koronavırýstyń asa juqpaly mýtasııalanǵan túri týraly ne bilemiz? Ulybrıtanııada vırýs juqtyrǵandar sany kúrt ósip keledi. Seısenbiniń ózinde 36 804 adamnyń indet juqtyrǵany rastalǵan. Bul – jaz aılaryndaǵy jappaı testileýden keıin bolǵan bir kúndik rekord. Al sońǵy 28 kúnde indet juqtyrǵandardyń ishinde 691 ólim tirkelgen. Mamandar vırýstar únemi mýtasııaǵa ushyrap, ózgerip otyratynyn aıtady, ony tek jiti baqylap otyrý kerek. Jalpy, vırýstyń bul túri qyrkúıekte tirkelgeni belgili. Qarasha aıynda Londonda anyqtalǵan naýqastardyń tórtten bir bóligi osy vırýsty juqtyrǵan. Al jeltoqsannyń ortasynda naýqastardyń úshten ekisinen vırýstyń jańa túri anyqtalyp otyr. Osydan-aq, onyń qanshalyqty juqpaly ekenin baıqaýǵa bolady. Sarapshylar Danııa, Aýstralııa Nıderlandta tirkelgen vırýstyń dál osy túri Ulybrıtanııadan kelgen bolýy múmkin dep topshylaǵan. Densaýlyq saqtaý salasynyń mamandary álemniń ár túpkirinde tirkelgen vırýstyń bastapqyda Ýhannan taraǵan koronavırýstan ózgerek ekenin aıtady. Máselen, aqpanda Eýropada anyqtalǵan vırýstyń túri keıinnen jappaı taraı bastaǵan. A222V dep atalatyn taǵy bir túri Ispanııadaǵy jazǵy demalysta órshigen. Ulybrıtanııadaǵy asa juqpaly túriniń paıda bolýyn kezekti naýqaspen baılanystyryp otyr. Boljam boıynsha indetpen kúresýge kúshi jetpegen ımmýndyq júıesi álsiz naýqastyń aǵzasy vırýstyń mýtasııaǵa ushyraýyna taptyrmaıtyn orta bolǵan. Degenmen vırýstyń qanshalyqty qaýipti ekenin kórsetetin naqty dálelder áli joq. Ǵalymdar zertteýi bir nátıje bergenge deıin, Eýropa úshin eń qarbalas merekelik kezeńnen esh qıyndyqsyz ótý mańyzdy.
