Izraılde saılaý bolady
Izraıldiń koalısııalyq úkimeti eldiń 2020 jáne 2021 jyldarǵa arnalǵan bıýdjetin bekitýde ortaq kelisimge kele almaǵandyqtan, elde taǵy saılaý ótetin boldy. Bul – eki jyl ishindegi tórtinshi saılaý. Nátıjesiz úsh saılaýdan keıin jáne pandemııany eskergen qos qarsylas «tótenshe» koalısııalyq úkimet qurýǵa kelisken edi. Soǵan sáıkes, premer-mınıstr laýazymyn eki partııa jetekshisi kezekpen atqarýy tıis-tuǵyn. Netanıahý birinshi bolyp qyzmet etse, 18 aıdan keıin óz jolyn Gansqa berýi kerek bolǵan. Bul kúrdeli mámiledegi jalǵyz qıyndyq – Parlament seısenbi kúni aldaǵy jyldarǵa arnalǵan el bıýdjetin bekitýi kerek-ti. Alaıda ortaq sheshimge kele almaǵan zań shyǵarýshy organ qaıta saılaý ótkizýge májbúr boldy. Saılaý kúni ázirge 23 naýryzǵa belgilenip otyr. Izraıl aldyńǵy úsh saılaýdy uıymdastyrýǵa mıllıardtaǵan shekel jumsaǵan. Kóptegen ızraıldik sarapshylar basynan bastap bıýdjet máselesi onsyz da berik emes bul odaqty ońaı buzatynyn boljaǵan edi.
Qazir Izraıl sheteldikter úshin jabyq. Ulybrıtanııada paıda bolǵan koronavırýstyń asa juqpaly túri týraly habar el bıligin alańdatqany sonshalyq, el shekarasy jabyldy. Al shetelden keletin el azamattary 14 kúndik karantınde bolady. Izraıl jaqynda ǵana jappaı vaksınalaýdy bastady. Aldymen medısınalyq mekemelerdiń qyzmetkerleri, osy salada bilim alýshylar jáne egde jastaǵy azamattarmen tyǵyz jumys isteıtin adamdar egiledi. Bılik el ishindegi qaýipsizdik sharalaryn da kúsheıtýdi qarastyrýda.
Olımpıada qarapaıym jaǵdaıda ótedi
Tokıo Olımpııa oıyndarynyń uıymdastyrýshylary kelesi jylǵy is-sharanyń ashylý jáne jabylý rásimderin qarapaıym etip ótkizý úshin jańa shyǵarmashylyq dırektor taǵaıyndady. Qyzmetine kirisken Hırosı Sasakıdiń basshylyǵymen shara az ǵana bıýdjetpen ótkizilýi múmkin. Sondaı-aq bul qadam pandemııamen baılanysty daǵdarysqa saı bolmaq deıdi uıymdastyrýshylar.
«Búkil álem tamashalaıtyn sporttyq mereke barshanyń kóńilinen shyǵatynyna senimdimiz. COVID-19 pandemııasymen baılanysty oıyndardy qarapaıym etip ótkizý – ýaqyt talaby», deıdi uıymdastyrý komıteti.
Sasakı jýrnalısterge bergen suhbatynda balalyq shaǵynda Tokıonyń alǵash ret 1964 jylǵy jazǵy Olımpııa oıyndaryn uıymdastyryp, keremet ashylý jáne jabylý saltanattaryn kórgenin eske aldy.
«Alaıda álemdegi jaǵdaıǵa baılanysty ondaı asta-tók sharalar ótkizý qazir orynsyz. Jáne bul barlyǵymyz úshin ózgerister ýaqyty bolýy kerek», degen pikir bildirdi ol. Maman aldaǵy sharany josparlaýda naqty sheshimder, kelisimderdiń áli bolmaǵanyn aıtyp, biraq Olımpııa oıyndary «qarańǵydan keıingi jaryq sáýle» ıdeıasyna negizdeletinin málimdedi.
Uıymdastyrýshylar sońǵy aptalarda jańa bıýdjet, is-sharanyń josparly kestesin jáne koronavırýsqa qarsy qaýipsizdik sharalaryn bekitip, daıyndyqty bastap ketti. Alaıda qoǵamda oıyndardy aldaǵy jyly da ótkizýge qarsy pikirler aıtylyp júr.
Bosqyndar máselelesi ýshyǵyp tur
Pandemııa álemde túrli sebeppen basqa mekenge qonys aýdarýdy kózdegen bosqyndardyń jaǵdaıyn kúrt tómendetken. Bıyl Mıanmadan qashqan 200-den astam rohındja bosqyndary teńizde joǵalyp ketken nemese qaıtys bolǵan. Bul týraly halyqaralyq uıymdar dabyl qaǵýda. BUU-nyń Bosqyndar jónindegi agenttigi Bangladeshtegi lagerlerden Malaızııa men Indonezııaǵa sapar shekkenderdiń úshten birinen kóbi balalar bolǵany málimdedi. Olardyń kóbi pandemııa shekteýlerine baılanysty baratyn jerine jete almaı, qaraqshylardyń qaıyqtarynda ashtan qyrylǵan bolýy múmkin. Osyǵan deıin Rohındja musylmandary qýǵyn-súrginnen qashyp, Mıanmadaǵy úılerin tastap ketken. Al Bangladeshke teńiz arqyly qaıta oralý qıyn bolǵan. О́ıtkeni el bıligi kóptegen qaıyqtardyń materıkke kirýine ruqsat bermegen. О́zge elderdiń úkimetteri de koronavırýstyń taralýyn toqtatý úshin shekaralaryn jaýyp, bosqyndardy qabyldaýdan bas tartqan.
Daıyndaǵan
Merýert BÚRKITBAI,
«Egemen Qazaqstan»
