Sý resýrstary komıteti tóraǵasynyń orynbasary Sembaı Seısenov sýdy kóp qajet etetin daqyldar egistigin azaıtý kerektigin alǵa tartty.
«Qazaqstanda sýarmaly jerlerge qajetti sýdyń kóp bóligi transshekaralyq ózenderge baılanysty. Jyl saıyn kórshiles elderden keletin sýlardyń azaıýyna baılanysty memlekettik baǵdarlamalar aıasynda júıeli jumys atqarýymyz kerek»,- dedi ol.
«Jergilikti atqarýshy organdar kúrish egetin sharýalarǵa sý tapshylyǵy máselesin túsindirýi kerek. Sý tapshylyǵyn boldyrmaý maqsatynda kúrish egisin 29 myń gektarǵa, atap aıtqanda Qyzylorda oblysynda - 15 myń , Almaty oblysynda 10 myń , Túrkistan oblysynda 4 myń gektarǵa azaıtý qajettiligi týyp tur. Basqa daqyldardy egýge kóshý qajet. Bul bir kýb kılometr sýdy únemdeýge múmkindik beredi»,- deıdi Sembaı Seısenov.
«Qazsýshar» respýblıkalyq memlekettik kásiporny Qyzylorda fılıaly dırektorynyń orynbasary Jorabek Ernazarov óńirde egistikke arnalǵan 178 myń gektar jerdiń 159 myń gektaryn kúrish alqaptary alyp jatqanyn aıtady. Onyń sózinshe, oblysta tıisti sharalar jedel atqarylmasa, sý problemasy jyl ótken saıyn kúrdelene beredi.
«О́tken jyly 89 myń 500 gektarǵa kúrish egilgen. Bıyl sony 84 myń 400 gektarǵa azaıtýdy josparlap otyrmyz. Memorandým boıynsha 75 myń gektarǵa deıin qysqarý kerek edi. Sonymen qatar sý tapshylyǵynyń aldyn alý maqsatynda jańbyrlatyp sýarý, tamshylatyp sýarý máselelerin qolǵa alyp jatyrmyz. Jańbyrlatý ádisimen 67 myń gektarǵa júgeri, 10 myń gektarǵa jońyshqa, tamshylatý ádisimen 3 myń gektarǵa qyzanaq egý jospary bar»,- dedi ol.
«Qazsýshar» RMK Jambyl fılıalynyń dırektory Qazybek Bedebaev oblysta tamshylatyp sýarý ádisindegi egistikter alqabyn bıylǵy 20 myń gektardan 50 myń gektarǵa jetkizý josparlanyp jatqanyn jetkizdi.
Efır barysynda Sý resýrstary komıtetiniń tóraǵasy atalǵan sharalardan bólek eldegi 119 sý magıstarldik kanaldaryn qaıta jóndeýden ótkizip, sıfrlandyrý tehnologııasyn engizý jospary bar ekenin de aıtty.
Eske salaıyq, 22 jeltoqsanda QR Úkimetiniń otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev 2020 jyldyń vegetasııalyq kezeńiniń qorytyndylary týraly baıandama jasap, sý tapshylyǵyn boldyrmaýdyń naqty amaldaryn usynǵan.
