«Áleýmettik medısınalyq saqtandyrý qory» KeAQ Nur-Sultan qalasy boıynsha fılıaly mamandarynyń habarlaýynsha, elordada ornalasqan Kardıohırýrgııa ortalyǵyna Qazaqstannyń kez kelgen aımaǵynan naýqastar portal, kvota arqyly túse alady. Oǵan eshqandaı shekteý joq. Ota kezeginde turǵan naýqastar kezegin shamamen 1 aıdaı ǵana kútedi.
«MÁMS aıasynda ota jasatqysy keletin naýqastardan mindetti túrde EKG, EHOKG, Holter monıtor EKG, jedel járdem kezindegi EKG suralady. Osy tekserýlerden keın bizdiń ortalyqta arıtmologtyń keńesi qajet. Maman keńesin alý úshin baılanys ortalyǵyna habarlasyp, aldyn ala jazylǵan jón», deıdi Ulttyq ǵylymı kardıohırýrgııa ortalyǵynyń ıntervensııalyq arıtmologııa bólimshesiniń meńgerýshisi, medısına ǵylymdarynyń doktory, qaýymdastyrylǵan professor, Qazaq arıtmologtar qoǵamynyń prezıdenti Aıan Ábdirahmanov.
Biraz ýaqyt buryn gıpertrofııalyq kardıomıopatııa dıagnozymen túsken naýqasqa Kardıohırýrgııa ortalyǵynyń dárigerleri Qazaqstanda jáne Ortalyq Azııada alǵash ret teri astyna qoıylatyn kardıoverter-defıbrıllıator apparatyn qoıdy (S-ICD - subcutaneous implantable cardioverter-defibrillator). Bul apparattyń ereksheligi múldem qan-tamyr júıesine eńgizilmeıdi, sonymen qatar teri astynda turyp kenetten bolatyn júrek óliminen qutqarady. Jańa joǵary tehnologııalyq qyzmet túrine jatatyn bul ota Kardıohırýrgııa ortalyǵynyń kúshimen jasaldy.
«Taǵy bir erekshe mysal: naýqas 36 jasta, dıagnozy – tolyq 3 sanatty AV-blokada. Birneshe ret elektrokardıostımýlıator aýystyrylǵan, biraq qan-tamyr men júrek ishindegi elektrodtary qala bergen. Bizdiń ortalyqqa túskende stımýlıatordyń orny irińdep, sepsıs bolǵan. Bul jaǵdaıda barlyq ishtegi ımplanttardy alý qajet, ishtegi elektrodtar tamyrmen - júrekpen bitip ketken. Ony alý naýqastyń ómirine óte kúrdeli, biraq almasqa amal joq. Ishtegi elektrodtardyń bárin alyp, ornyna TMD memleketteri ishinde alǵashqy bolyp 2017 jyldyń 22 tamyzynda elektrodsyz dúnıe júzindegi eń kishkentaı Micra stımýlıatoryn ornattyq. Qazir naýqastyń jaǵdaıy jaqsy, jylyna 1 ret baqylaýǵa kelip turady», dep eske alady A.Ábdirahmanov.
Qazir Kardıohırýrgııa ortalyǵynda júrek yrǵaǵynyń buzylýyna qatysty barlyq zamanaýı joǵarǵy tehnologııalyq otany jasaýǵa múmkinshilik bar. Bilikti dárigerler úshin tipti jańa týǵan nárestelerge de ota jasaý – qalypty jaıt.
«Júrek yrǵaǵynyń buzylýy kóbine júrek aqaýy, ıshemııa, qan qysymynyń kóterilýi, t.b. júrek aýrýlarynyń sebebinen bolady. Sondyqtan múmkindiginshe sportpen aınalysý, dıeta ustaný, maıly tamaqtan tejelý, artyq salmaqtan arylýdyń jolyn izdeý qajet. Júrek aýrýlarynyń aldyn alý – salamatty ómir súrýge baılanysty» dep keńes beredi mamandar.
