Atalǵan shara 24-25 jeltoqsan kúnderi Túrkııadaǵy Tonykók eskertkishiniń 1300 jyldyǵyna arnalǵan halyqaralyq ǵylymı-onlaın sımpozıým aıasynda ótkizilip otyr. Aıta keteıik, sımpozıýmdy IýNESKO Túrkııa Ulttyq komıssııasy jáne Pamýkkale ýnıversıteti uıymdastyrǵan.
Ǵalym Myrzataı Joldasbekovtiń túrik tiline aýdarylǵan bul kitabynda Uly dala ádebıetiniń kóne dáýirdegi arǵy tegi men damý kezeńderi, keıinnen kemeldengen jaýhar mura retinde jer-jahanǵa tanylýy, janrlyq túrleri baıyp, jańa zamanǵa ulasqan sóz ónerimizdiń alýan túrli dástúr sabaqtastyǵy tereń zerttelip, jan-jaqty paıymdalady. Avtor Uly dala ádebıetiniń myń jyldan astam burynǵy tasqa tańbalanǵan ejelgi mátinderin, qaǵazǵa túsken orta ǵasyrlardaǵy nusqalaryn, sonymen birge HH ǵasyr bederinde aýyzsha úlgide damyǵan tókpe aqyn-jyraýlyq poezııanyń tuńǵıyq tabıǵatyn keshendi túrde júıelep, saraptaıdy.
Bes bólimnen turatyn bul eńbekti túrik tiline Túrkııanyń Pamýkkale ýnıversıtetiniń oqytýshysy PhD doktory Jazıra Otyzbaeva tárjimalaǵan. Qazaqstannyń Túrkııadaǵy Tótenshe jáne ókiletti elshisi Abzal Saparbekuly bastamasymen iske asqan aýdarma jumystaryn Eýrazııa Jazýshylar odaǵy basyp shyǵarǵan.
Tusaýkeser rásimine Qazaqstannyń Túrkııadaǵy Tótenshe jáne ókiletti elshisi Abzal Saparbekuly, fılologııa ǵylymdarynyń doktory, professor, belgili ǵalym Shákir Ibraev, fılologııa ǵylymdarynyń doktory, professor Shaımerdenova Nurılá, PhD doktory Gúlim Shádıeva, Qazaqstannyń eńbek sińirgen qaıratkeri, qobyzshy Álqýat Qazaqbaev, t.b. zııaly qaýym ókilderi qatysty.
