Bir aı buryn Nur-Sultan qalasyndaǵy Nazarbaev Zııatkerlik mektebiniń hımııa pániniń sarapshy muǵalimi Dınara Beısembaeva «Qazaqstan muǵalimi– 2020» ulttyq syılyǵynyń úzdik ondyǵyn bastap, bas júlde ıegeri atanǵan bolatyn.
Atalmysh bedeldi syılyq úzdik otandyq pedagogtarǵa bıyl ekinshi márte tabystaldy. 2019 jyly Global Teacher Prize» resmı ókili bolyp tabylatyn Alııa Nazarbaevanyń Qoǵamdyq mańyzdy bastamalar qory «Qazaqstan muǵalimi» ulttyq syılyǵyna bastama jasady.
Búginde Dınara Beısembaeva Qazaqstandaǵy «Global Teacher Prize» ambassadory:
– Jahandyq syılyqtyń basty qaǵıdaty – qoǵamǵa qyzmet etý. Saýalnama toltyrý kezeńinde-aq, júlde qoryn qaıda jaratar edińiz degen suraqqa aýyl mektebine qoldaý kóreseter edim dep jaýap bergenmin.
Nura aýdanynyń Ahmet aýyly Sáken Seıfýllın atyndaǵy mektepke «Global Teacher Prize» ambassadorymen birge onyń týǵan mektebinen qoldaýshylar toby: dırektor Sabyrjan Sadýaqasov, muǵalimder Gúlmıra Abısheva men Rınat Qudaıbergen, joǵary synyp eriktileri – Janııa Keńes, Jáńgir Murat, Dinmuhammed Jumaǵul keldi.
Jasyl óskin – NIS belgisi bar qorapshalarda Dınara Toktarkanovna júlde qorynyń bir bóligine alǵan hımııa kabınetiniń zerthanalyq jabdyqtary bar.
Dınara Beısembaevanyń bastamasyna Nazarbaev Zııatkerlik mektepteri qoldaý bildirýdi uıǵaryp, jınalǵan qarjyǵa aýyl oqýshylaryna naǵyz jańajyldyq syılyq bolǵan kompıýter men proektor alyndy.
Dınara Beısembaevanyń aýyldaǵy áriptesterine ádistemelik qoldaý kórsetý boıynsha úlken josparlary bar. «Sandyq ǵylym úıde» elektıvti kýrsynyń avtory retinde ol hımııa jáne bıologııa pánderiniń muǵalimderimen tájirıbesimen bólispekshi, sondaı-aq, zertteýdi sandyq formatta uıymdastyrý boıynsha elektıvti kýrs baǵdarlamasyn ázirleýde.
Áleýmettik jelilerde úlken jumys júrgizýdi jalǵastyrýda, búginde feısbýktegi «Hımııa pániniń muǵalimderi» toby pedagogıkalyq sheberliktiń jańa alańyna aınalyp otyr. S.Seıfýllın atyndaǵy orta mekteptegi pán boıynsha áriptesterimen yntymaqtastyq ornatý jaıy talqylanýda.
– Elimizdegi júzdegen aýylddyń ishinen múmkindik týyp jahandyq syılyqtyń ambassadorymen kezdesý biz úshin úlken mártebe, sonyń nátıjesinde Zııatkerlik mekteptermen dostasyp jatyrmyz, – dep Sáken Seıfýllın atyndaǵy orta mekteptiń dırektory Atymtaı Balabıev aǵynan jaryldy.
– Búginde Nazarbaev Zııatkerlik mektepteri jalpy pedagogtardyń, eń aldymen aýyl muǵalimderiniń kásibı damýy boıynsha úlken jumys atqarýda. Qańtar aıynan bastap biz ulttyń uly ustazy, aǵartýshysy, jazýshysy Ybyraı Altynsarınniń 180 jyldyǵyna arnalǵan pedagogıkalyq sheberliktiń onlaın alańy jobasyn bastamaqpyz, – deıdi «Nazarbaev Zııatkerlik mektepteri» derbes bilim berý uıymynyń basqarma tóraıymy Kúlásh Shámshıdınova.
«Qazaqstan muǵalimi– 2020» ulttyq syılyǵynyń jeńimpazy, Petropavl qalasyndaǵy Nazarbaev Zııatkerlik mektebiniń fızıka páni muǵalimi Dına Qudabaevanyń bastamasymen oblystyq Oqýshylar saraıynda erekshe bilim berý qajettiligi bar balalardyń bos ýaqytyn tıimdi ótkizýge arnalǵan kabınet ashylmaq.
