Atyraý qalalyq polısııa basqarmasy jedel basqarý ortalyǵynyń ınspektorlary shaǵyn aýdandarǵa júrgizilgen beınemonıtorıng kezinde uıaly telefonymen aınalany túsirip júrgen azamatty baıqaǵan.
«Departamenttiń esirtki qylmysyna qarsy is-qımyl basqarmasynyń qyzmetkerlerimen ustalǵan jigit kórshiles Aqtóbe oblysynyń turǵyny bolyp shyqty. Onyń Atyraýǵa sıntetıkalyq esirtkini satý úshin arnaıy kelgeni belgili boldy. Jeke basyn, sondaı-aq, turǵylyqty mekenjaıyn tintý kezinde kúshti áser etetin pırrolıdınalerofenon preparaty (alfa-PVP) tabylyp, alyndy», dedi oblystyq polısııa departamentiniń bastyǵy Qamza Úmbetqalıev.
Tárkilengen sıntetıkalyq esirtkiniń jalpy salmaǵy 208 gramdy qurady. Al odan 650-den astam doza daıyndalady.
Ustalǵan jigittiń Atyraý qalasynda turǵan mekenjaıynan esirtkini ólsheıtin tarazy, býyp-túıýge arnalǵan qurylǵylar tabyldy. Qazir 25 jastaǵy jigit tergeý ızolıatoryna qamaýǵa alyndy.
