Sondaı-aq, tórt fýtbol alańy jańartylyp, ákimshilik ǵımarat jóndeýden ótti. Tarazdyq turǵyndardyń qýanyshyna Jambyl oblysynyń ákimi Berdibek Saparbaev ortaqtasyp, kópshilikti arnaıy kelip quttyqtady.
Ákim óz sózinde búginde jambyldyqtardyń 32 paıyzy buqaralyq sportpen aınalysatynyn jetkizdi.
«Bizdiń maqsatymyz – bul kórsetkishti arttyra túsý. О́ıtkeni kez kelgen eldiń jetistigi, eń aldymen, ulttyń densaýlyǵyna baılanysty. Osy oraıda oblysymyzda jańa sport nysandary salynyp, eskileri qaıta jańǵyrtylýda. «Ulan» stadıony buǵan deıin tozyp, aıanyshty kúıde bolǵan. Trıbýnalar, fýtbol alańy, bári eskirgen edi. Balalar eski doptarmen oınap júrgen. Endi, mine, birneshe aıdyń ishinde stadıonnyń adam tanymastaı ózgergenin kórip turmyz. Jaqyn mańdaǵy saıabaq ta kóp uzamaı jańa keıipke enetin bolady. Ata-analar balalary stadıonda shynyǵyp jatqanda, sol saıabaqta tynyǵyp ýaqyt ótkizetin bolady», Berdibek Saparbaev.
Sonymen qatar stadıon aýmaǵynda eki qabatty jekpe-jek zaly boı kóterdi. Jas sportshylar munda fýtbol, jeńil atletıka, erkin kúres, dzıýdo, armrestlıng, ústel tennısi, karate jáne bokspen aınalysa alady. Buryn olar ynǵaılastyrylǵan nysanda jattyqqan bolsa, endi olar úshin zamanaýı kópfýnksıonaldy ǵımaratta aınalysa alady.
Turǵyndardy kópten kútken qýanyshymen qazaqstandyq taekvondoshy Rýslan Japarov ta arnaıy kelip quttyqtady.
«Bala kezimde meniń kóp jattyǵýym osy jerde ótken bolatyn. Men stadıonnyń jańartylǵanyna shyn júrekten qýanyshtymyn. Endi balalar qolaıly jaǵdaıda sportpen shuǵyldanatyn bolady», dedi ol.
1988 jyly salynǵan sport kesheni 5 mamandandyrylǵan balalar men jasóspirimder sport mektebiniń balansynda. Bul rette atalǵan mekemeniń dırektory, grek-rım kúresinen sport sheberi, Olımpıada oıyndarynyń júldegeri Aqjúrek Tańatarov jambyldyq balýandar, dzıýdoshylar, boksshylar túrli jarystarda jeńimpazdar qatarynan kórinip júrgenin, endi ózi basqaryp otyrǵan sport nysany osy baǵytta ári qaraı damyp, Olımpıada chempıondaryn daıyndaýǵa nıetti ekenin jetkizdi.
