Senat Tóraǵasy osy jylda búkil álemmen birge Qazaqstan úshin de ońaı bolmaǵanyn, dúnıe júzinde pandemııamen kúres jáne ekonomıkalyq daǵdarystyń saldaryn joıý baǵytynda kóp jumys atqarylǵanyn aıtty.
«Bizdiń elimizde de Prezıdentimizdiń basshylyǵymen aýqymdy jumys isteldi. Pandemııamen kúreske qajetti barlyq is-sharalar qolǵa alyndy. Osy jerde negizgi másele qarjyǵa baılanysty ekeni belgili. Sondyqtan Parlament 2020 jylǵy bıýdjetke tolyqtyrýlar engizgen kezde, aldaǵy jyldyń bıýdjetin qaraǵanda pandemııamen kúres máselesine basymdyq berdi», dedi Máýlen Áshimbaev.
Sondaı-aq, ekonomıkalyq ósýdi qalpyna keltirýge, pandemııadan zardap shekken sektorlardy jáne bıznesti qoldaýǵa arnalǵan zańdar da qabyldanǵany týraly aıtyldy.
«Bıyl pandemııamen kúreske basymdyq bere otyryp, barlyq kerekti zańdardy, qajetti normalardy, bıýdjetimizdi ýaqtyly jáne sapaly qabyldadyq. Sonymen birge memlekettiń strategııalyq maqsattary da nazardan tys qalǵan joq. Prezıdentimizdiń jańǵyrý baǵdarlamasyn júzege asyrýǵa basa mán berdik. Soǵan sáıkes saıası júıemizdi jańǵyrtý jáne basqarý júıesiniń tıimdiligin arttyrý baǵytynda strategııalyq mańyzy bar zańdar qabyldandy», dedi Senat tóraǵasy.
Sonymen qatar ol bıyl Parlament pen Úkimet tolyq túsinistikpen jumys istegenin, sonyń aıasynda birqatar mańyzdy qujattar qabyldanǵanyn jetkizdi.
«Memleket basshysynyń tapsyrmasyna sáıkes Úkimetpen birge «Salyq kodeksine» ózgerister engizdik. Bul kodeks tek salyq jınaý úshin ǵana jumys istemeıdi. Ekonomıkamyz qıyndyqtarǵa tap bolǵan qazirgideı kezeńde «Salyq kodeksi» óziniń yntalandyrýshy rólin júzege asyrýy kerek. Osyndaı kezde ol bıznesti, kásipkerlerdi yntalandyrýy qajet. Sol qaǵıdanyń negizinde biz Úkimetpen tyǵyz jumys istep, qujatqa mańyzdy ózgerister engizdik», dep atap ótti Áshimbaev.
Senat tóraǵasy halyqtyń áleýmettik jaǵdaıyn jaqsartýǵa arnalǵan zańdar da qabyldanǵanyn aıtty. Odan bólek, bıyl Parlament qabyldaǵan «Halyq densaýlyǵy jáne densaýlyq saqtaý júıesi týraly kodeks» pen «Ekologııalyq kodekske» keńinen toqtaldy.
Odan bólek, suhbat barysynda joǵary palatynyń bıylǵy atqarǵan jumystary, qabyldanǵan zańdardyń mańyzy jáne Parlamenttiń aldaǵy maqsat-mindetteri týraly aıtyldy.
