Al Shyǵys Qazaqstanda tyń tehnologııany qoldanysqa engizý úshin ekinshi deńgeıli banktermen kelisim jasalyp, daıyndyq jumystary júrgizilip jatyr. Bloktardyń tehnıkalyq rettelgen tizbegi túrindegi «Blockchain» júıesi jeke málimetterdi úshinshi tulǵalarǵa berý múmkindiginen saqtap, aqparattyq qaýipsizdik pen sapaly qyzmetti qamtamasyz etedi.
«Azamattarǵa arnalǵan úkimet» memlekettik korporasııasynyń basqarma tóraıymy Ásemgúl Baltashevanyń aıtýynsha, «Blockchain» tehnologııasy kepil shartyn tirkeý úrdisin barynsha ońtaılandyrýǵa jol ashty.
– Buǵan deıin qyzmet alýshylar múlik kepil shartyn tirkeý úshin birneshe mekemeni aralaýǵa májbúr bolatyn. Máselen, jyljymaıtyn múlikke quqyqtardy tirkeý týraly anyqtamany alý úshin HQO-ǵa nemese egov.kz portalyna júginip, sosyn ony bankke aparatyn. Endi bank qyzmetkeri ótinim jasaǵanda qyzmet alýshynyń jyljymaıtyn múlikke quqyqtary jáne aýyrtpalyqtardyń bar-joǵy týraly málimetter avtomatty túrde tekseriledi. Endi adamdar emes, málimetter siz úshin «júgiretin» boldy, – deıdi Á.Baltasheva.
«Blockchain» tehnologııasyn qoldaný arqyly atalǵan qyzmetti kórsetý merzimi úsh kúnnen bir kúnge deıin qysqaryp, bankke usynylatyn qujattar tizimi de azaıǵan.
Endi qyzmet alýshy banktiń aqparattyq júıesinde múlik shartymen tanysyp, óziniń ESQ-sy arqyly qol qoıady, al qyzmettiń nátıjesi – jyljymaıtyn múlikke quqyqtardy memlekettik tirkeý týraly habarlama qyzmet alýshynyń egov.kz elektrondy portalyndaǵy jeke kabınetine joldanady.
«Blockchain» tehnologııasyn tańdaý barysynda jeli qoldanýshylarynyń áreketteriniń aıqyndyǵy, ortalyqsyzdandyrý jáne senimdi qorǵanys júıesi esepke alyndy. Elimizde kepil shartyn tirkeý boıynsha memlekettik qyzmetti jańa ádispen kórsetý úrdisi kommersııalyq banktiń birimen júzege asýda.
«Azamattarǵa arnalǵan úkimet» basqa da ekinshi deńgeıli banktermen osy baǵytta qyzmet kórsetý týraly kelissózder júrgizip jatyr. Sebebi «Blockchain» tehnologııasy eki jaqty kelisim jasasý kezinde úshinshi tulǵalardy kiristirmeı, qaýipsizdikti qamtamasyz etip, jyljymaıtyn múlik kepilimen beriletin nesıeni onlaın resimdeý jáne nesıe berý merzimin qysqartýǵa múmkindik beredi.
Shyǵys Qazaqstan oblysy
