Bir qyzyǵy, Merkel hanymnyń merzimi aıaqtalyp kele jatqanymen, Germanııada onyń tanymaldylyǵy birneshe ese arta tústi. Máselen, ótken aıda júrgizilgen saýaldamaǵa súıensek, ony qoldaıtyndar sany 70 paıyzdan asyp túsipti. Jaýap bergenderdiń kópshiligi kanslerdiń koronavırýspen kúrestegi eńbegin joǵary baǵalaǵan.
Degenmen, 2021 jyldyń qazanynda Angela Merkeldiń ókilettigi aıaqtalady. Sodan keıin el tizginin kim ustamaq? Onyń izbasary kim bolmaq? Qazir Germanııany osy suraq mazalap tur. Ásirese taıaýda telearnalardyń birine suhbat bergen kanslerdiń sózi pikirtalasty odan ári damyta tústi. Suhbat barysynda jýrnalıst «Bálkim, keıde osy qyzmette qala bergenim durys bolar edi degen oı kele me?» degen suraǵyna Merkel «joq» dep qysqa qaıyrǵan. Osylaısha, izbasarǵa qatysty boljam qyzý talqyǵa ulasyp jatyr.
Áý basta qazirgi kansler óziniń izbasary retinde qorǵanys mınıstri Annegrat Kramp-Karrenbaýerdi tańdaǵan edi. Biraq CDU partııasynyń ishinde qoldaýǵa ıe bolmaǵandyqtan, ol usynystan bas tartty. Negizi Annegrat hanym 2017 jyldan beri partııanyń tóraǵasy qyzmetin atqaryp kelgen edi. Osylaısha, CDU-diń tizginin ustaýǵa tartys qyza tústi.
Qazirgi tańda Merkeldiń jolyn jalǵaýdan úmitker úsheý. Olar: Germanııanyń eń halqy kóp óńiri – Soltústik Rın-Vestpalııa premer-mınıstri Armın Laschet, Býndestagtyń syrtqy ister komıteti tóraǵasy Norbert Roettgen jáne zańger Frıdrıh Mers.
Jalpy, «Hrıstıan demokratııalyq odaǵy» partııasynyń kóshbasshysyn tańdaý qıynǵa soǵyp tur. Annegrat Kramp-Karrenbaýer laýazymynan bas tartqannan keıin kóp uzamaı koronavırýs pandemııasy bastalyp, partııa ishilik saılaý jaıyna qaldy.
Joǵaryda Merkeldiń izin jalǵaıtyn úsh kandıdattyń tizimin keltirdik. Dál qazir solardyń qaısysy ozyp shyǵatynyn dóp basyp aıtý qıyn. Jalpy, Angela hanym Armın Laschetti durys kóredi. Koronavırýs indeti jappaı taraǵanǵa deıin ol týraly el ishinde jyly pikir qalyptasqan-tuǵyn.
Biraq pandemııa bárin ózgertip ketti. Máselen, Soltústik Rın-Vestpalııa shtaty vırýstan qatty zardap shekti. Aımaqta dertke shaldyqqandar sany kún sanap artyp jatqan kezde Laschet lokdaýn engizýge asyqqan joq. Onyń ústine, alǵashqylardyń biri bolyp karantındik shekteý sharalaryn jeńildetýge kiristi. Osylaısha áp-sátte turǵyndardyń narazylyǵyna ushyrady.
Sarapshylardyń paıymdaýynsha, Laschettiń koronavırýsqa jol bermeý jónindegi áreketteri onyń kóshbasshylyq qabiletine nuqsan keltirdi. Nátıjesinde, onyń partııa tóraǵasyna saılaný yqtımaldylyǵy kúrt tómendegen.
Norbert Rettgen men Frıdrıh Merstiń de asyǵy alshysynan túsip turǵany shamaly. Áıtse de keıingisi saýaldamalarda qarsylastaryna qaraǵanda bir saty joǵary tur. Onyń ústine, Mers ózininiń lıberaldy kózqarasymen belgili. Biraq partııanyń ishinde asa tanymal emes.
Qysqasy, Germanııanyń kelesi kansleri kim bolatyny ázirge jumbaq. О́ıtkeni Angela Merkel sekildi saıasatkerdi almastyrý ekiniń biriniń qolynan kele bermeıtini belgili. Basqasyn aıtpaǵanda, iri halyqaralyq jıyndarda, joǵary deńgeıdegi kezdesýlerde únemi qyzǵylt-sary beshpet, qara shalbar kıip júretin Angela Merkeldi álemdik qoǵamdastyq salmaqty saıasatker, qajymaıtyn qaıratker retinde jaqsy biledi.
Kez kelgen máselede óz eliniń múddesimen qatar, Germanııa múshe bolyp tabylatyn Eýropalyq odaqtyń da múddesin qorǵaýdan áste sharshaǵan emes. Sondyqtan bolar, onyń usynysymen odaq quramyndaǵy elderdiń basshylary da sanasady.
Angela Merkel Germanııa tarıhynda kanslerlik qyzmetke saılanǵan tuńǵysh áıel jáne ol osy joǵary laýazymdy atqarǵandardyń ishindegi eń jasy. Sondaı-aq saıasatker GFR kansleri bolyp tórt márte, «Hrıstıan-demokratııalyq odaǵy» partııasynyń jetekshiligine qatarynan toǵyz ret saılanǵan tulǵa.
