Pandemııa kezinde volonterler qamqorlyq kórsetýden aıanyp qalǵan joq. Ár aýdanda qurylǵan toptar jalǵyz turatyn zeınetkerlerge, múmkindigi shekteýli jandarǵa jáne kóp balaly otbasylarǵa kómektesip otyrýǵa tyrysty. Olardyń kómegi bir rettik aksııalarmen shektelmeı, úzdiksiz júrgizildi. Mysaly, erekshe muqtaj adamdarǵa tamaq, dári-dármek, medısınalyq maskalar aparyp berdi. Odan bólek psıhologııalyq qoldaý da kórsetti. Jyl sońyna qaraı volonterlerdiń eńbekteri de eskerilip, úzdikteri marapatqa ıe boldy.
«Jyldyń mesenaty» atalymy Borodýlıha aýdanynyń turǵyny «Assortı 2» sharýa qojalyǵynyń basshysy Igor Shevchenkoǵa buıyrdy. Ol qojalyq jumysshylaryna únemi kómektesip, sábıli bolǵandarǵa 100 myń teńgeden kómek kórsetip otyrady. Jyl saıyn turǵyndarǵa baqsha ósirý, qysta jáne jazda joldardy kútip ustaý, kóktem kezinde sý burý, arnalaryn tazartý jumystaryna qolǵabys etedi.
Sondaı-aq «Eren erlik» atalymy boıynsha volonterlik qyzmetke belsene qatysqany úshin Kýrchatov qalasynyń volonterlik qozǵalys ortalyǵynyń tóraıymy Ásemgúl Qalımoldına marapattaldy.
Ol Kýrchatovtaǵy volonterler qozǵalysyn keńeıtip, qaıyrymdylyq iske 2 myńnan astam adamdy tartqan. Ásemgúl Qalımoldına «Balalarǵa júrek syıla», «Qus ashanasy», «Biz birgemiz», «Meıirimdi kórshiler», «Meıirimdi is», «Jaqsylyq joly», «Myń alǵys», «Maska taǵyńyz» syndy volonterlik aksııalardy uıymdastyrǵan.
– 2020 jyl Volonter jyly bolyp jarııalana salysymen jospar jasadyq. Sol jospar negizinde bir jyl boıy azdy-kópti eńbek ettik. Ásirese ekologııalyq sharalarǵa kóp bet burdyq. Sonymen qatar jalǵyzbasty jandarǵa, qarııalarǵa, az qamtylǵan otbasylarǵa qol ushyn sozýǵa tyrystyq. Jýyqta ǵana shaǵyn ortalyqqa baryp, baldyrǵandarmen birlesip, qustarǵa uıa jasadyq, – deıdi volonterler qozǵalysynyń tóraıymy Ásel Qalımoldına.
Kýrchatov qalasynda kómekke muqtaj turǵyndar ortalyqqa habarlasyp, kerek-jaraqtaryn aıtsa, volonterler kómek kórsetýge ázir turady. Qalanyń elgezek jastary kóshe sypyrýshylarǵa ystyq shaı men baýyrsaq usynyp ta alǵysqa bólengen. Al qalanyń mesenattary ár juma kúni az qamtylǵan otbasylarǵa tegin nan taratady. Ásemgúl Qalımoldınanyń aıtýynsha, volonter jyly aıaqtalǵanymen, jumys jalǵasa bermek.
Shyǵys Qazaqstan oblysy
