Dúleı qarly borandar AQSh-tyń ońtústiktegi shtattary aýmaǵyn shat-shálekeı etýin jalǵastyryp jatyr. Kúshti jeldiń áseri men symdardyń qatyp qalýynan úzilip ketip jatqan elektr qýaty jelileri isten shyǵýlaryna baılanysty negizinen Tehas shtatynyń 130 myńǵ jýyq tutynýshysy jaryqsyz qalyp otyr. Bul týraly ITAR-TASS habarlady.
Aýa raıynyń qıyn jaǵdaıynan myńnan astam avıareıster toqtatylyp tastaldy. Avıasııa bıligindegilerdiń málimetinshe, 3,5 myń adam Dallas áýejaıynda (Tehas shtaty) túnep shyǵýǵa májbúr bolǵan. Bılik ókilderi adamdardan barynsha sabyrlylyq tanytýdy, múmkindigi bolǵanynsha jeke kólikterimen jolǵa shyqpaýdy, sondaı-aq asa bir qajettilik bolmasa, kóshege de shyǵa bermeýdi ótinip jatyr.
Aýa raıynyń qolaısyz jaǵdaıy kóptegen jol-kólik oqıǵalarynyń oryn alýlaryna da sebepker bolýda. Qazir keıbir joldardaǵy muzdyń qalyńdyǵy 8 santımetrge deıin jetken. Dallastaǵy temperatýra qazir nólden 4 gradýs tómen bolyp tur. Ádette jyldyń bul mezgilinde mundaǵy aýa raıy 15 gradýstyq jylylyqty kórsetedi eken.
Jergilikti bılik jeksenbide 25 myń adamnyń qatysýymen ótetin bolyp belgilengen marafondy toqtatyp qoıdy.
AQSh Ulttyq aýa raıy qyzmetiniń málimetinshe, qazirgi tańda asa qýatty salqyn aýa tolqyny birtindep shyǵys jaǵalaýǵa qaraı jaqyndap keledi. Jaqyn arada soltústik aýdandarda kúshti qar men muzdy jańbyr jaýýy, ońtústikte nóser jaýynnyń oryn alýy kútip tur.
Sáken Maılybaı.
Derekkóz: ITAR-TASS.
