Teń múmkindikter úshin kúresip, múgedektigi bar balalarǵa qol ushyn berip kele jatqan uıymdardyń biri – «Bolashaq K» qoǵamdyq qory. Uıym Atyraý oblysy boıynsha jumys jasaıdy, eresekter men balalarǵa arnalǵan ortalyqta ońaltý qyzmetterin usynady.
«Bizdiń uıym 20 jylǵa jýyq áleýmettik jobalar aıasynda aımaq turǵyndaryna kómek berip kelýde. Degenmen tehnologııanyń damyp turǵan zamanynda tek dástúrli ońaltý ádisin qoldaný balalardy aıaqqa turǵyzý ýaqytyn tejeıtinin túsindik. Ortalyqtyń jumys isteý tıimdiligin arttyrý, sondaı-aq emdelýshi balalardyń sanyn kóbeıtý máselelerin sheshýdiń jańa jolyn qarastyrý kerek boldy. Qoldaý kózin izdep júrip, «Áreket» granttar baıqaýy jaıynda estidik», - dep áńgime órbitti uıym basshysy Jibek Bısenova.
Uıym qyzmetkerleri kóp oılanbastan berilgen múmkindikti qoldaný kerek dep sheshti. Osylaısha olar baıqaýdyń alǵashqy kezeńine «Áleýmet úshin áreket» jobasynyń ótinimin joldady. Aımaqtyq kezeńderden sátti ótken joba ıdeıa avtorlaryna elordaǵa joldama syılady. Baıqaýdyń sońǵy kezeńinde barlyq kommersııalyq emes uıymdar oqýdan ótip, alǵan bilimderin jobany usyný jáne júzege asyrý kezeńderinde qoldanýǵa múmkindik aldy. Nátıjesinde «Bolashaq K» qory komandasy «Samruk-Kazyna Trsut» qory uıymdastyrǵan baıqaýda úzdik dep tanylǵan 27 KEU qataryna ilikti. Kóp uzamaı qor músheleri jobanyń alǵashqy qadamdaryn bastap ketti.
Joba aıasynda ortalyq jańa fızıoterapııalyq emdeý jabdyqtarymen jaraqtandyryldy. Zamanaýı portatıvti elektroterapevtıkalyq apparattarda ońaltý sharalaryn júrgizý boıynsha ortalyqtyń 3 mamany oqytyldy. Bunyń barlyǵy qyzmet kórsetý sapasyn jaqsartýǵa jáne erekshe qajettilikteri bar balalardy kóbirek qamtýǵa múmkindik berdi.
«Balamnyń dıagnozy serebraldy mı saldanýy ekenin bilgende onyń ómirinde ońaltý sharalarynyń qanshalyqty mańyzdy bolatynyn elestetken joqpyn. Qyzym turaqty túrde jylyna birneshe ret ońaltý kýrstaryn alyp turý kerek. Mundaı jıilikpen memlekettik mekemelerde kómek alý múmkin emes, sebebi kezek aqyryn jyljıdy. Al qymbat ońaltýdy qaltamyz kótere bermeıdi. Biraq «Bolashaq» ortalyǵynda bizge jeńildik qarastyrylǵan. Ol úshin biz erekshe alǵys bildiremiz», - deıdi Nesibeliniń anasy.
Ortalyqta keshendi kómek kórsetiledi: reabılıtolog, nevrolog, pedıatr mamandarynyń keńesi men em júrgizýi, emdik dene shynyqtyrý, Voıt jáne Bobat ádisterin qoldanyp ońaltý, kınestetıks jáne kınezıoterapııa. Sonymen qatar pedagogıkalyq túzetý de qarastyrylǵan - logoped, defektolog, ergoterapevt mamandarynyń korreksııalyq sabaqtary men jáne psıhologııalyq qoldaý.
«Áleýmet úshin áreket» jobasy aıasynda atyraýlyq erekshe qajettiligi bar balalarǵa, atap aıtqanda serebraldy mı saldanýy bar (4 formasy), aýtızm spektri buzylǵan, Daýn sındromy bar balalarǵa jáne t.b. ońaltý kýrstary usynyldy. Kýrs 10-15 kún júrgiziledi, oǵan mamandardyń sabaqtary men keńesteri, massaj túrleri, jattyǵýlar, jańa jabdyqtarda jasalatyn em sharalar syndy keshendi qyzmet túrleri jatady. Jobanyń arqasynda aqyly kórsetilgen qyzmetterdiń esebinen 28 «erekshe» balaǵa tegin kómek kórsetildi.
«Áleýmettik kásipkerlikti damyta kele biz turmys jaǵdaıy tómen, áleýmettik osal otbasylardan shyqqan balalarǵa tegin qyzmet kórsete alamyz – bizdi baqytty etetini de osy. Al jobamyzdyń qarjylaı turaqtylyǵy aqyly qyzmetterdi kórsetýmen negizdelgen», - deıdi uıym basshysy Jibek.
Ortalyq ujymy qazirgi jetistiktermen shektelip qalmaq emes. Uıym músheleri «Samruk-Kazyna Trust» qory «Áreket» jobasy aıasynda uıymdastyrǵan oqý baǵdarlamalarynda alǵan bilimderin shyńdap, tájirıbede júzege asyrýǵa yntyq. Sońǵy bolǵan jaǵdaılarǵa qaramastan ortalyq jumys turaqtylyǵyn saqtap qala aldy. Qazirgi tańda uıym barlyq karantındik sharalardy saqtaı otyryp jumys jasaıdy.
