Búginde Ekologııa, geologııa jáne tabıǵı resýrstar mınıstrliginiń málimetterine sáıkes, respýblıka boıynsha jalpy uzyndyǵy 15,5 myń km quraıtyn 74 toptyq sý qubyry bar. Onyń ishinde 13 myń km bolatyn 37 sý qubyry respýblıkalyq menshikte. Olar 1,1 mln adam turatyn 608 aýyldyq eldi mekendi sapaly aýyz sýmen qamtıdy.
Eger 2019 jyly Pavlodar oblysyndaǵy Belovodskıı, Maı jáne Qaraǵandy oblysyndaǵy Jáırem-Qarajal sý qubyrlary paıdalanýǵa berilse, 2020 jyly jumysy aıaqtalǵan nysandar sany kóbeıdi.
Olardyń ishinde Almaty oblysy Qarasaı aýdanyndaǵy Qaskeleń toptyq sý tartqyshy da bar. Jobanyń jalpy quny 2 493,8 mln.teńgeni quraıdy. Joba 2013 jyly bastalyp, Ekologııa mınıstrliginiń kómegimen 2020 jyldyń jeltoqsan aıynda paıdalanýǵa berildi. Nátıjesinde 100 myń turǵyny bar Qaskeleń qalasyndaǵy sýmen jabdyqtaý jumysy jaqsara tústi.
Osy jyly júzege asqan taǵy bir joba - Batys Qazaqstan oblysy Syrym aýdany Kenashy jer asty sýlary ken ornynan Jympıty aýylyn sýmen jabdyqtaý. Joba quny - 2 157,4 mln.teńge. Onyń arqasynda 2 eldi meken aýyz sýmen qamtamasyz etilip, Syrym aýdanynyń 10 myń turǵyny bar 5 eldi mekeninde sý berý máselesi jaqsartyldy.
Budan bólek Qyzylorda oblysyndaǵy Jıdeli toptyq sý qubyrynyń paıdalanýǵa berilýi nátıjesinde 14,5 myń adam turatyn 8 aýyl sapaly aýyz sýǵa qol jetkizdi. О́ńirde 2021 jyly Jańaqorǵan aýdanyndaǵy Talap sý qubyrynyń qurylysy aıaqtalmaq. Onyń jalpy quny - 5 932,3 mln.tenge. Aıaqtalǵannan keıin 9 aýylǵa sý jetkizý jaqsaryp, 19,7 myń adam turatyn 3 aýyl aýyzsýmen qamtylady.
Atalǵandarmen qatar, Soltústik Qazaqstan oblysynda Presnov toptyq sý qubyry (II kezeń) qaıta jańartýdan ótip jatyr. Jobanyń jalpy quny - 4 699,6 mln.teńge. 2021 jyly ol paıdalanýǵa berilse, óńirdiń 16 myń turǵyny bar 17 aýylynda sý berý jaqsarady.
Mınıstrlik 2022 jyldyń sońyna deıin qurylysy uzaqqa sozylǵan úsh jobany aıaqtaýdy josparlap otyr.
«Úkimettiń tapsyrmasymen mınıstrlik buryn bastalyp, aıaqtalmaǵan jobalardy qolǵa aldy. Biz 2019 jyly 3 magıstraldi sý qubyryn qoldanysqa berdik, bıyl – 1 sý qubyryn, al 2022 jylǵa deıin taǵy 3-eýi paıdalanýǵa beriledi. Bul 210,6 myń adam turatyn 39 aýyldy sýmen qamtıdy», - dedi Sý resýrstary komıteti tóraǵasynyń orynbasary Maqsat Aıashev.
Aıta keteıik, búginde qalalardyń 97,2%-y, al aýyldardyń 86,4%-yna ortalyqtandyrylǵan sýmen jabdyqtaý jetken. 5 jyl ishinde elde 3 myń shaqyrym toptyq sý qubyrlary salynady. Osylaısha, aýyz sýmen qamtý 100%-ǵa jetkiziledi.
