Mańǵystaý oblysy boıynsha ekologııa departamentiniń habarlaýynsha, zerthanalyq baqylaý nátıjelerine sáıkes Aqtaý qalasynda atmosferaǵa lastaýshy zattar shyǵaryndylarynyń shekti ruqsat etilgen konsentrasııadan asyp ketkeni baıqalady. Atap aıtqanda, azot dıoksıdiniń shekti ruqsat etilgen konsentrasııasy 1,5 ese bolsa, metan 1,8 ese artqany baıqalady. Sonymen qatar «Qazgıdromet» RMK Mańǵystaý fılıalynyń meteorologııalyq derekteri de Aqtaý qalasynyń 15 jáne 33 shaǵyn aýdandaryndaǵy stasıonarlyq beketterde azot dıoksıdi mólsheriniń artqanyn rastap berdi. Bul rette jeldiń baǵyty «Shyǵys soltústik-shyǵys» baǵytyna sekýndyna 4/5 metr, saǵat 18:00-den 23:00-ge deıin «Shyǵys ońtústik-shyǵys» baǵytyna sekýndyna 2/4 metrge ózgergeni belgili boldy.
Lastaýshy zattardyń shyǵýy «MAEK-QazAtomónerkásip» JShS, «QazAzot» AQ, «Kaspıı bıtým» JShS, «Mangystau Oil Refining» JShS, «Aqtaý teńiz porty» AEA, «Qaztransoıl» AQ sııaqty basqa da kásiporyndar jaǵynan baıqalady. Ekologııa departamenti aýany lastaý kózderi joǵaryda atalǵan kásiporyndardyń qyzmetimen baılanysty degen boljam jasap otyr.
Ekologııa kodeksiniń 117, 118-baptaryn basshylyqqa ala otyryp, oblystyq ekologııa departamenti jospardan tys tekserý úshin Mańǵystaý oblysynyń mamandandyrylǵan tabıǵat qorǵaý prokýratýrasyna júginbek. Atalǵan departamenttiń baspasóz qyzmeti tekserýdiń nátıjeleri týraly qosymsha habarlanatynyn jetkizdi.
Mańǵystaý oblysy
