Aımaq basshysy aldymen «Baıqońyr» úıine kirip, otbasy múshelerimen tanysty. Bul otbasynda ár ulttyń balalary tárbıelenedi. Otbasynyń ana-tárbıeshisi Juldyz Sádibekovabalalardyń bólmelerin kórsetti. «Baıqońyr» úıiniń birinshi qabatynda oıyn bólmesi bar. Tárbıelenýshiler munda bos ýaqyttarynda oıyn oınap, qolónermen aınalysady. Al, balalardyń oqý bólmesinde Elbasyna arnalaǵan Qurmet taqtasy ornatylǵan. Úıdiń ekinshi qabatynda jatyn bólmeleri men qonaq bólmesi ornalasqan.
Aımaq basshysy Gúlshara Ábdiqalyqova «Alataý»shyǵarmashylyq úıiniń jumysymen de tanysty. Akt zalynda óńir basshysy balalar úıiniń tárbıelenýshileri uıymdastyrǵan jańa jyldyq merekelik sharany tamashalap, olardy merekemen quttyqtady.
- Qurmetti balalar, meniń jas dostarym! Sizderdi kele jatqan jańa 2021 jylmen shyn júrekten quttyqtaımyn! Balalarymyz ozyq oıly, bilimdi bolsyn degen nıetpen qazirgi tańda memleket tarapynan da, óńir tarapynan da barlyq jaǵdaı jasalýda. Bos ýaqyttaryńyzdyń tıimdi ótýi úshin osy jerde «Robototehnıka», «Medıa klýb», «Shaǵyn tigin sheberhanasy», «Balalar jáne qolóner bólmesi» jáne «Art stýdııasy» ashyldy. Sizder sportpen shuǵyldansyn, jany sergek, táni saý azamat bolsyn dep qalamyzdaǵy «Muz aıdyny», «Evrazııa», «Tarlan» sport keshenderi men «Oqýshylar saraıyna» tegin qyzmet etýdi úılestirdik. Men apaılaryńyzdan Sizderdiń jaǵdaılaryńyzdy únemi surap otyramyn. Jetken jetistikteriń kóńilimizdi marqaıtady. Atap aıtsam, Rano Sabanqulova Londonda ótken halyqaralyq shyǵarmashylyq festıvalinde I oryn alypty. Al, bıshiler men ánshiler toby jaqynda Polsha, Túrkııa elderinde ótken halyqaralyq baıqaýlarda birinshi orynǵa ıe bolypty. Árdaıym osylaı zor jetistikke jete berińizder! – dedi oblys ákimi G.Ábdiqalyqova.
Shara sońynda balalar úıiniń aýlasyndaǵy jasyl shyrsha qasynda aımaq basshysy tárbıelenýshilermen estelikke sýretke tústi.
