О́ńirdegi Kentaý qalasyna qarasty 12 aýyldyq okrýgi aýmaǵynan jańa aýdan quryldy. Eleýli oqıǵany el qulaǵyna jetkizý úshin oblys ákimi О́mirzaq Shókeev Kentaý qalasyna arnaıy kelip, turǵyndarmen júzdesti.
«Búgin biz ózderińizben úlken tarıhı oqıǵanyń kýágeri bolyp otyrmyz. Kentaý qalasyndaǵy eldi mekenderdiń damýyna qansha kóńil bólgenimen, ári qaraı damytý baǵyttary meni kópten beri tolǵandyryp júrgen máselelerdiń biri bolatyn. Bulaı deıtin sebebim, Kentaý qalasy shekarasynyń keńeıýi, turǵyndar sanynyń eki esege artýy, 12 aýyldyq okrýgtiń Kentaý qalasynda ornalasýy qala deńgeıin aýdandyq deńgeıge kóshkenin kórsetip otyr. Bul óz kezeginde turǵyndar úshin kórsetiletin memlekettik qyzmet sapasynyń tómendeýi, eldi mekenderdegi ınfraqurylym júıelerimen az qamtylýy, qala ortalyǵynyń aýyldyq eldimekenderden shalǵaıda ornalasýy, sondaı-aq, Kentaý qalasy óz tarıhynda polımetall rýdasyn óndiretin ónerkásiptik qala retinde damyǵandyǵyn eskersek, Kentaýdyń aýdandyq ortalyqqa aınalýy is júzinde qala damýynyń baıaýlaýyna jáne aýylǵa jetkiliksiz kóńil bólinýine ákelýi múmkin. Joǵaryda aıtylǵan máselelerdi oı eleginen ótkizip, saralaı kele, qazirgi qalyptasqan ahýal nazarǵa alyndy. Jańadan qurylatyn aýdanǵa «Saýran» ataýyn berip, ortalyǵy etip «Shornaq» eldimekenin bekitýdi oryndy dep sanaımyn», dedi oblys ákimi.
Jańa qurylatyn aýdanǵa «Saýran» aty beriledi. О́ıtkeni ortaǵasyrlyq tarıhı Saýran qalasy Uly Jibek jolynyń boıynda ornalasqan jáne ejelgi Túrkistan uǵymymen baılanysty. Shornaq eldi mekeni jańa aýdannyń ákimshilik ortalyǵy bolyp qalyptaspaq.
