Syrqat – tán jarasy bolsa, qaıǵy – jan jarasy bolyp, qos qaptaldan qoltyqty sóge qaqyrata soqty. Qos ishekten shertilgen sherter kúıdeı – shyrǵalańy kóp bolǵanymen, shyǵar muńdaı halyqtyń birligi men bekemdigi shyńyraýdyń qulamasyna qulatqan joq. «Qaıǵyń qara kóje bolsyn» dep burynǵylar beker aıtpaǵanyna taǵy bir márte kóz jetkizdik. Qara sýǵa semirip júrgen qaıǵysyz kúnderge qaıyryla zer saldyq. Kún túsken jerge kóleńke de túsetinin baǵamdadyq. Elemegen aýrý esirkemeıtinin eskere bastadyq. Eki dúnıeniń arasy bir qadam bolǵan bul jyly tán de aýyrmasyn, jan da aýyrmasyn degen júregi izgi jandar jurt bolyp jumylýdyń názıra úlgisin kórsetti.
Naýryz merekesin qarsy alyp jatqan kezde náýbettiń dúıim dúnıege taraǵanyn baǵamdaǵan memleket basshylyǵy der kezinde eldiń etek-jeńin qymtap, karantındik sharalar qabyldady, shekaralar jabyldy, qalalarǵa blok-beketter qoıyldy, halyqtyń qalypty qarym-qatynasy shekteldi. Memleket basshysy Qasym-Jomart Toqaev pen Elbasy Nursultan Nazarbaev halyqqa birneshe márte úndeý joldap, tótennen kelgen tumaýǵa qarsy tótenshe jaǵdaı jarııalady. Bul sharalardyń barlyǵy Qazaqstan halqynyń koronavırýs indetine qarsy alǵashqy qýatty ımmýnıteti bolǵanyn atap aıtýymyz kerek. Árıne, atalǵan shekteýler alyp elderdiń de ekonomıkasyn shaıqaltyp jiberdi. Dese de, elimizde halyqty áleýmettik qorǵaýǵa erekshe nazar aýdarylǵany málim. Qazir qashyqtan jumys isteý, qashyqtan oqý, qashyqtan saýda jasaý qalypty iske aınaldy. Osylaısha, bir jylǵa jeter-jetpes qysqa ǵana merzimde dóńgelengen dúnıeniń dıdary ózgergenine kýá boldyq. Osy syndarly kezeńde synaqtan jeke tulǵa retinde de, jalpy qoǵam retinde de shyńdalyp shyǵatynymyzdy sezindik.
«Egemen Qazaqstan» gazetiniń ótip bara jatqan jyldyń negizgi qorytyndylaryna arnalǵan
materıaldaryn 3-15 betterden oqı alasyzdar
