Pań ónerdiń padıshasy

Kim bilsin, qoradaǵy qoıyn qomsynyp, qııadaǵy qyrandy qolyna qondyrýǵa qushtar pende shirkinniń kóńil kókseýi taýsylǵan ba?..

Bir bilgishterdiń aıtýynsha, adamnyń aty-jóni keıde taǵdyr-talaıyna áserin tıgizetin kórinedi. Sol sózdiń jany bolsa kerek. О́ıtkeni bizdiń keıipkerimizdiń esim-soıyn atasaq, kóz aldyńyzǵa asyl muratyn aıalaǵan arý qyzdyń altyn aıdaı aıaýly beınesi keleri anyq.

Asyldyń synyǵy, altynnyń úzigi

Ol Gagarın ǵaryshqa ushyp, ot aýyz­dy Oljas aqyn «Adamǵa tabyn, jer, endi» dep asqaqtaıtyn aıtýly alpys birdiń alǵashqy kúni Almatyda dúnıege keldi. Ata-anasy kórermen kózaıymyna aınalǵan arqaly ónerpazdar bolatyn. Ekeýi Abaı atyndaǵy opera jáne balet teatrynyń sahnasynda birge samǵady. Syr-symbaty kelisken jarasymdy jupqa jurt syrtynan qyzyǵa qaraıtyn.

Ákesi Ábdýahım qazaq balasy úshin beıtanys balet álemine buzyp-jaryp kirgen bula talanttardyń biri edi. Qatarynan qara úzip Lenıngradtyń horeografııa ýchılıshesinde oqydy. 1958 jy­ly Máskeýde ótken Qazaq mádenıetiniń on­kúndigine qatysyp, «Qurmet belgisi» or­denimen marapattaldy. Qazaq KSR-iniń eńbek sińirgen ártisi ataǵyn aldy. Aǵa býyn ókilderi onyń bıindegi ózgeshe ór­nekti emirene eske alady. Kózin kórgen áriptesteri men shákirtteri alǵyrlyǵyn alǵa tartady. Oı-órisiniń keńdigin, mine­zi­niń márttigin jyr qylyp aıtady.

Altynaıdyń aıtqandarynan: Men papamdy meılinshe jaqsy kórdim. Tula boıy tunǵan talant-tuǵyn. Maǵan ol bárin biletindeı kórinetin. Eshkimge uqsamaıtyn erekshe jan ekenin kishkentaı kúnimnen sezetinmin. Ádebıetpen áýestendi. Qoly­nan kitap túspeıtin. Meniń atymdy Shyńǵys Aıtmatovtyń «Alǵashqy ustaz» povesiniń negizgi keıipkeriniń qurmetine qoıǵan. О́zi de óleń jazdy. Sýretti qan­daı salatyn. Qylqalam sheberleriniń shedevrlerin jerine jetkize taldaıtyny eriksiz tańdandyratyn. Mýzykany odan da jetik biletin. Mýzeılerge, kór­melerge, konsertterge qolymnan jetektep aparatyn. Kóshede áldebir áýen estilse, «Mynaý kimniń shyǵarmasy?» dep suraıtyn. Dál tapsam qýanyp, kúm­piń qaǵady. Qatelessem, kádimgideı qapa­lanyp, «Qyzym, munyń uıat. Qaıdaǵy Chaıkovskıı? Glınka ǵoı bul!» deıtini áli esimde. Senesiz be, sol kisiniń arqasynda antıkalyq dáýirdiń aıshyqty týyndysy sanalatyn grek mıfterin shemishkeshe shaǵatynmyn. Keıin bular paıdaǵa jarady. Tipti burymymnyń ózin túrlishe óretinin qaıtersiń. Lenıngradta oqyp júrgenimde jazǵan syrshyl hattary sandyqshamda saqtaýly tur. Keýdemdi saǵynysh kernegende ońasha otyryp oqıtynym bar...

Qazaqy qısynǵa súıensek, qasqa aı­ǵyrdan keminde tóbel qulyn týady. Áne, kórdińiz be, qyl aıaǵy janýarlarǵa deıin tuqymyna tartady. Al adamdar ekibastan. Buqar jyraý aıtqandaı, «Jaqsydan jaman týsa da, jamannan jaqsy týsa da – tartpaı qoımas negizge».

Tektilik – qanmen bitetin qasıet. En­­deshe, Altynaıdaı ardaǵymyz aspannan túsken joq. Kisilik qonǵan jerdiń qyzy. Babasy Asylmurat qazirgi Qa­raǵandy obysynyń Aqtoǵaı óńirinde «sansyz qara aıdaǵan, shalǵynǵa bıe baılaǵan» myńǵyrǵan baı bolǵan. Jaqsy-jaısańdarǵa jaýdaı tıgen keńestik ókimettiń kesirinen atylyp ketken. Dala degdarynyń nemere baýyry Alashqa aty máshhúr Narmanbet Ormanbetuly patshalyq Reseıdiń otarshyldyǵyna qarsy qalam siltegeni ámbege aıan.

«Qalmady, eı, Saryarqa, sende qyzyq,

Sandal taý, sary ólkeni aldy mujyq»

Sondaı-aq «Saryarqadan sán ketti, qazaqtan qýat ál ketti» degen jyr joldary bodandyq buǵaýynda bulqynǵan halqymyzdyń aıanyshty halin ańǵartady. Taǵdyr tálkegin qoısańshy bul. Orystyń basqynshylyq saıasatyn ólerdeı sy­naǵan ór aqynnyń shóberesi sol orys kórkemóneriniń kórnekti ókili bolaryn kim boljapty.

Atasy Ábilbek «halyq jaýynyń» balasy bolǵandyqtan jergilikti bel­sendilerdiń qýǵyn-súrgininen qutylmaq oımen amalsyz Almatyǵa kósh­ken. Boıdaǵy qarym-qabileti jaı jat­qyzsyn ba, qara dombyrasyn qushaqtap, talaı mádenıet mekemesiniń esigin qaq­qan. Aqyry Ahmet Jubanov qurǵan ha­lyq aspaptary orkestriniń quramyna qabyl­danypty. Sodan el basyna ekitalaı kún týǵanda soǵysqa attanǵan. Esil er qan maıdannan qaıtpady. Artynda ańyrap súıgen jary Bıbisara men eki uly – Ábdýahım men Mels qaldy.

Altynaıdyń naǵashy jurty da tegin jandar emes. Naǵashy atasy Nıkolaı Sıdorov – Neva jaǵalaýynyń týmasy. Bilikti balet mamany. Mańdaıyna bitken jalǵyz perzenti – Galınasynyń sońynan erip talaı jerdiń dámin tatypty. Aqyry Almatyǵa at baılaǵan. Qyzy qazaq azamatymen turmys qurǵan soń Alataý aıasyndaǵy ásem shahardy turaqtap qalǵan.

Altynaıdyń aıtqandarynan: Áke-sheshemniń qosylýy bir hıkaıa. Teatrda tabysqan. Birin biri unatqan. О́nerde de, ómirde de birge bolýǵa kelisken. Biraq Bıbisara ájem ulynyń tańdaýyna qarsylyq tanytypty. Túsinýge bolady árıne. Balasy qazaqtyń qyzdary quryp qalǵandaı kúıeýinen ajyrasqan orys kelinshegimen otasqanyn qaıdan jaqtyrsyn.. Alaıda qol ustasýǵa bekingen qos ǵashyq alǵan betterinen qaıtpaǵan. Sodan kópke deıin ájemniń ókpesi tarqamapty. Tek, men týǵanda ǵana  «otymnyń aldy, sýymnyń tunyǵyndaı tól nemeremdi ákelip kórsetińder» depti qatýly qabaǵyn sál jibitip. Kórgen bette kóńildenip sala bergen. Ákemnen aınymaı qalǵan túrimnen aınalyp, meıirlene ıiskepti. Keıin aralasyp kettik. Ol bizden bólek turdy. Keıde úıimizge kelip meni baǵatyn. Tamaqty talǵap jeıtin. Ekeýimiz eki tilde sóılesek te bir-birimizdi keremet túsinetinbiz. Alty-jeti jasymda ol maǵan óz qolymen tikken túıe jún kórpe syılady. Jep-jeńil, jyp-jyly. Ábden tozyǵy jetkenshe jamyldym.

Naǵashylarym Sankt-Peterbýrgtiń sarsúıek zııalylary sanatynan. Das­tarqan basynda ylǵı balet jaıynda aıtylatyn. Naǵashy atam Semenova, Ýlanova sekildi sańlaqtardyń sahnadaǵy sheberlikterin shejire etip shertýden sharshamaıtyn. Jaryqtyq Qazaqstan mádenıetiniń damýyna da qomaqty úles qosty. Al mamamnyń sheshesi stýdenttik shaǵymda Lenıngradta páter jaldap, meni jalǵyzsyratpady. Baletpen alańsyz aınalysýyma barlyq jaǵdaıdy jasap baqty. Kıimim jýýly, tamaǵym pisirýli boldy. Mine, men osyndaı ortada óstim.

Iá, eki jurty da óner ólkesinen nápaqa tergen Altynaıdyń aıy ońynan týǵany zańdylyq eken-aý.

Balette janǵan baq

«Uıada ne kórseń, ushqanda sony ilesiń». Ata-babalarymyz bárin bilip aıtqan. Basqalardy qaıdam, Altynaıǵa bul naqyldyń tikeleı qatysy bar. О́ıtkeni ol ónerdi áspettegen shańyraqta týyp-ósti. Kózin ashyp kórgeni teatr. Es bilgennen estigeni – sol salaǵa qatysty áńgimeler. Úılerine keletin qonaqtar da – sahnanyń qyr-syryna qanyq ártister qaýymy. Úrip aýyzǵa salǵandaı súıkimdi sábıge olardyń da yqylasy talaı aýǵan shyǵar. Baýyrlaryna tartyp, basynan sıpaǵan bolar.

Aıaǵyn apyl-tapyl basqannan teatr qabyrǵasynda oınady. Áke-sheshesiniń grım jasaıtyn bólmesi, repetısııa za­ly, san márte spektakl tamashalaǵan sal­tanatty sahna – bári-bári jasynan jan dúnıesin baýrady. Oǵan baletten basqanyń bári bótenniń baqshasyndaı kórinetin.

Bir qyzyǵy, Ábdýhım men Galına álpeshtegen Altýsıalary ózderiniń jolyn qýǵanyn qalamady. Kúrmeýi kóp kúrdeli kásiptiń qıyndyqtaryna qyzdaryn qı­maǵany da. Ári-beri aqyldasyp, mýzyka mektebiniń fortepıano synybyna berdi. Alaıda Altynaıdyń esil derti balet edi.

Aqyry ata-anasy ony Lenıngradtyń A.Vaganova atyndaǵy horeografııa ýchılıshesine aparatyn bolyp sheshti. Túsip ketse quba-qup. Túspese Almatyda mýzyka sabaǵyn jalǵastyrady. Sóıtip Galına Nıkolaevna qarshadaı qyzyn jetektep kezinde kúıeýi ekeýi bilim al­ǵan oqý ordasy ornalasqan aq túnder qa­lasyna attandy. Bular kelse irikteý sy­naqtary aıaqtalyp ketipti (anasy emtıhan merziminen ádeıi keshiktirip ákelgenin keıipkerimiz keıin bildi). Qabyldaý komıssııasy qujattaryn qabyldamaı, kelgen izderimen keri qaıtýǵa oqtalǵanda oıda-joqta aldarynan osyndaǵy oqy­týshylardyń biri Anna Petrovna Bajaeva jolyǵa qalmasy bar ma. Qudiretti kúshti Qudaı sátin túsirse shalqaıǵan sharýanyń túzelip ketýi op-ońaı eken ǵoı. Toqsan aýyz sózdiń tobyqtaı túıinin aıtsaq, Altynaıdyń aldynan aq kún týyp, Anna Pavlova, Galına Ýlanova sekildi tu­ǵy­ry bıik tulǵalar tárbıelengen ataqty «Vaganovkanyń» bosaǵasynan ımene attady.

Talaı talanttyń tusaýyn kesken Inna Zýbkovskaıanyń mektebinen ótken jas daryn ataǵynan at úrketin S.M.Kırov atyndaǵy (qazirgi Marııa teatry) opera jáne balet teatryna qabyldandy. Alǵashynda buǵan sener-senbesin bilmedi. Balettiń kileń korıfeıleri jınalǵan baıyrǵy ujymǵa tastaı batyp, sýdaı sińýdi oılaýdyń ózi qorqynyshty. Ylǵı yǵaılar men syǵaılardy sahnadan yǵystyrý túgil solardyń kóleńkelerinde qalyp qoımaýdyń qamy seni biraz áýre-sarsańǵa salýǵa jetip jatyr. Baletti bastaǵan barlyq qyzdar eliktep-solyqtaǵan Irına Kolpakova, Gabrıella Komleva, Tatıana Terehova, Lıýbov Kýnakova, Olga Chenchıkovalardyń shashbaýyn kóterýge de ájeptáýir shamań bolýǵa tıis.

Baǵyna qaraı, Altynaı kordabalettegi kóp bıshilerdiń biri bolyp uzaq júrmedi. Tulpardy taıynan tanıtyn KSRO halyq ártisi Olga Moıseeva balǵyn darynnyń daralyǵyn birden baıqady.

Altynaıdyń aıtqandarynan: Ula­ǵatty ustazymnyń aldynda basymdy ıemin. Qatty qaryzdarmyn. Qana­tynyń astyna alyp, qamqorlyq kórsetpegende taǵdyrym basqasha qalyptasar ma edi, kim bilsin. Jalpy, men uıań minezdilerdiń qataryna qosylamyn. Julqynyp turmaımyn. О́lip-óship ózimdi kórsetýge joqpyn. Sahnadan tysqary tirlikte pysyqtyǵym shamaly. Olga Nıkolaevna teatrda jumys istegen 22 jyldyń bárinde meniń tálimgerim boldy. Kordabalette júrgende-aq aqyryndap úlken rólderge daıyndaı bastady. Ju­mysty júıeli júrgizetin. Sonyń ná­tıjesinde tvorchestvolyq turǵydan er­te eseıdim. Sheberligim tez shyńdaldy. Barlyq problemamyzdy bastyqtarǵa baryp ózi sheshetin. Biz mamandyǵymyzdy tereńirek meńgerýden basqa nársege bas qatyrmadyq.

Kórgeni jaqsy kósh bastaıtyny belgili. Boıyndaǵy beıimdiligi men eńbekqorlyǵy eki jaqtap Altynaıdy alǵa súıredi. Talan­tyn elge tanytty. Bıik shyńdardy ba­ǵyndyrdy. Álemge áıgili Marııa teatrynyń prımasy atandy. Bir balerına armandaıtyn basty partııalardyń barlyǵyna jýyǵyn oryndady. Biregeı beınelerdiń bárin tizbelemeı-aq, Odetta – Odıllııa («Aqqý kóli»), Jızel («Jızel»), Avrora («Uıqydaǵy arý»), Baıaderka («Baıaderka»), Zarema («Baqshasaraı burqaǵy»), Medora («Korsar») sııaqty orny bólek obrazdardy aıtsaq ta jetkilikti ekeni daýsyz.

Sahnada juptasyp bılegen serikteri de shetinen sen tur, men ataıyn seriler boldy. Attaryn atasaq, Konstantın Zaklınskıı, Farýh Rýzımatov, Igor Zelenskıı, Mahar Vazıev, Irek Mýhamedov, Iаn Breks jáne basqalar bolyp jalǵasa beredi.

Aıtpaqshy, Altynaı ómirlik jaryn da ónerden tapty. Kúıeýi Konstantın Zaklınskıı – Reseıdiń eńbek sińirgen ártisi.

Altynaıdyń aıtqandarynan: Birde bizdiń ýchılıshede Kırov teatrynyń beldi ártisteri Galına Mezenseva jáne Konstantın Zaklınskıımen kezdesý keshi uıymdastyryldy. Italııadan gastroldik sapardan oralǵan betteri eken. Sóz kezegi kelgende Konstantın kórgen-bilgeni men kóńilge túıgenderinen góri iship-jegenin, satyp alǵan sándi aıaq kıimin aıtyp kóńilimdi qaldyrǵany. Odan da Rımdegi Qaıta órleý dáýirine qatysty qundylyqtardan alǵan áserlerin baıandamaı ma?! Janymda otyrǵan qurbylarymnyń «ózi bylaı óńdi eken» desken kúbir-sybyryn estigende eriksiz myrs ettim. Bizben birge Ravıl Bagýddınov esimdi eresekteý jigit oqydy. Sol áldebir basqosýda qolyma shıyrshyqtalǵan qaǵaz ustatty da, «Mynda Kostıa Zaklınskııdiń telefon nómiri jazylǵan. Sen oǵan mindetti túrde qońyraý shal. Saǵan ǵashyq bolyp qalypty» dedi qýaqylana jymıyp.­ Qanym basyma shapshyp álgi qaǵazyn qaq aıyrdym. «Anaýyńa sálem aıt...» Qysqasy, jelikken «jeńgetaıdyń» ıt terisin basyna qaptap jiberdim. Keıin teatrǵa kelgende Kostıamen sahnada kezdestim. Sodan ba, sońyra aramyz jaqyndaı tústi. Sóıtsem, ol men oılaǵandaı elteńbaı-selteńbaı emes eken. Andreı Voznesenskııdiń mahabbat jyrlaryn jatqa oqyǵanda ony múldem basqa qyrynan tanyǵan tárizdimin. On toǵyz jasymda Kostıamen otaý qurdym. Sodan beri ónerde de, ómirde de birge kele jatyrmyz. Anastasııa atty qyzymyz «Astana Opera» teatryndaǵy balet trýppasynyń solısi.

Keńes Odaǵynda keremet bıimen erekshelengen Altynaı Asylmuratovany attaı qalap shaqyrǵan sheteldik teatrlar az bolǵan joq. Amal neshik, ondaı utymdy usynystardan belgili sebeptermen bas tart­ty. Tek qaıta qurý qarqyndaǵan tus­ta ǵana Eýropaǵa esik ashyldy. Ol osy múmkindikti paıdalanyp, Batys bale­tinde baq synaýǵa bel býdy. Aldymen An­glııanyń Koroldik baletinde, sonan soń ataqty Rolan Petıdiń Marsel ulttyq ba­letinde óner kórsetti. Bı áleminiń piri Rýdolf Nýreevtiń alqaýymen «Parıj Ope­rada» «Baıaderka» men «Aqqý kóliniń» qoıy­lymdarynda basty partııalarda kórindi.

Eýropany eleńdetken Altynaı Asyl­muratova men Farýh Rýzımatov aıdy aspanǵa shyǵaryp, Amerıka asqanda tań­daı qaǵyp, bas shaıqamaǵandar kemde-kem. Kezinde KSRO-dan «qashyp» ketken dúnıejúzilik deńgeıdegi dúldúlder Mıhaıl Baryshnıkov pen Natalıa Makarova olardyń Nıý-Iork tórinde oı­qas­taýyna jol ashty. Mundaı qurmetke bólený buǵan deıin óńderi túgil tústerine de kirmegen oqıǵa-tyn.

Altynaıdyń aıtqandarynan: Kapıtalızm men sosıalızm arasynda temir shymyldyq túrilisimen-aq Farýh ekeýimiz Keńes baletshileri ishinen birinshi bolyp qashpaı-pyspaı, resmı túrde sheteldiń bedeldi sahnalaryna shyqtyq. Búginde onyń joly ońaı. Al erterekte tıisti mekemelerdiń ruqsatynsyz attap baspaıtynbyz. Úsh áriptiń qyzmetkerleri qyr sońymyzdan qalmaıtyn. Eshkimge ermeı, óz betimizshe saparlaǵan sáttegi sezimimizdi jetkizý qıyn. Syrttaǵy syrttandardyń biri – ózimizdiń Rýdolf Nýreevpen Parıjde júzdesip, til qatysqany úshin kúıeýim Konstantın Zaklınskııdiń bálege ushyraı jazdaǵanyn qaıtip umytaıyn. Bárin aıt ta, birin aıt, Rýdolf Nýreev, Mıhaıl Boryshnıkov, Natalıa Makarova, Rolan Petı, Kennet Makmıllan, Morıs Bejar syndy HH ǵasyrdyń uly horeograftarymen jumys istegenimdi maqtan tutamyn.

Aıdynyna oralǵan aqqý

Ataǵy aspandaǵan qazaqtyń qadirli qyzy bıshi retinde úlken sahnamen qoshtasqan boıda A.Vaganova atyndaǵy Orys balet akademııasynyń kórkemdik jetekshisi bolyp taǵaıyndaldy. On úsh jyl boıy kezinde ózi oqyp bitirgen horeografııa ordasynda orasan ister tyndyrdy. Qandasymyzdyń qadiri artqanyna syrttaı súısingenimizdi nesine jasyraıyq. Balettegi bes batpan bedeliniń baǵalanǵany ǵoı. Áıtpese ormandaı uıysqan orysta bul orynǵa laıyqtylar az boldy deımisiz?!

Tórkinin «tanymaı» ketken jatjurttyq qyzymyzdyń tarıhı otanyna taban tiregenin ishteı tileıtinbiz. Elge at izin salmaı ketkenine eptep renjigenimiz de ras. Qarap tursaq, shartarapty sharlaǵan Altynaıymyz kindik qany tamǵan Almatysynda bir-aq ret bılepti.

...Aqyry Altynaı aıdynyna qonǵan aqqýdaı bolyp eline oraldy. Kóptegen kósheli isterge bastamashy bolǵan Elbasy Nursultan Nazarbaev ony astanaǵa aldyrtty. Aqordada eki márte qabyldap, mártebesin kóterdi. Qolyna bir emes, eki qyzmettiń tizginin ustatty. Ol búginde elorda­myzda ashylǵan Qazaq ulttyq horeografııa akademııasynyń rektory jáne «Astana Opera» teatry balet trýp­pasynyń kórkemdik jetekshisi.

Aınalasy bes-alty jylda Qazaqstan mádenıetin jahanǵa tanytý baǵytynda biraz sharýanyń basy qaıyryldy. Bilikti mamannyń kásibı tájirıbesi kádege jarady. Máselen, álemdik balettiń jer júzin jaýlaǵan jaýharlary astanalyqtar repertýarynan oryn alýda. Balet trýppasy sheteldik gastrolderge shyǵyp, tól ónerimizdi tórge órletti. Bolashaǵynan úmit kúttiretin Baqtııar Adamjan, Mádına Baspaeva, Áıgerim Beketaeva, Serik Naqysbekov qatarly jastar halyqaralyq báıgelerde top jardy.

Altynaıdyń aıtqandarynan: О́neri órge júzgen órenderimiz jeterlik. Biz olardy ataq, aqsha qýýǵa emes, ónerge adal qyzmet etýge baýlyǵanymyz jón. Únemi izdenis ústinde júrýge úıretýimiz kerek. Daralanǵan daryndarymyzdy joǵaltyp almaý qajet. Keıbiri shetke ketkisi keledi. Men ózimizdegi qyz-jigitterge eń áýeli týǵan elimizge eńbek sińirýleriń kerek degen keńes aıtamyn. Shekaranyń arǵy jaǵynan sheberlerdi shaqyrýdy óz basym qoldaı qoımaımyn. Múmkindiginshe, óz juldyzdarymyzdy jarqyratqan abzal. Olardyń baqytty basqa jaqtan izdemeı, týǵan topyraǵynda tý tigýi úshin óz basym solardyń jetekshisi retinde bar kúshimdi salamyn. 

Ulttyq balet akademııasynyń da mindeti ushan-teńiz. Bul – Ortalyq Azııadaǵy balet kadrlaryn daıarlaıtyn jalǵyz joǵary oqý orny. Oqý korpýsy, jataqhanasy zamanaýı talaptarǵa saı jabdyqtalǵan. Osynda oqıtyn jetkinshekterdiń jaǵdaıymen tanysqan Ýlıana Lopatkına, Irek Muhamedovteı myqtylardyń rızashylyqpen jetkizgen rııasyz maqtaýlaryn óz qulaǵymyzben estigenimizdi atap ótkenimiz oryndy.

Altynaıdyń aıtqandarynan: Artylǵan senimdi aqtaý jolynda aıanbaımyn. Jaýapkershilik júgin pedagogterimiz jete sezinedi. Balet balalardy tártipke úı­retedi. Átteń, adamzatty alańdatqan pan­­demııa kesirinen irgeli ister irkilip qaldy. Onlaın oqý bizdiń júıege onsha keliń­­­kiremeıdi. Mýzykanttar aspabyn úı­le­­rinde otyryp-aq tarta alady. Shákirt­­terimiz zalda jattyqpasa bolmaıdy. Qaı­temiz, kóppen kórgen qıyndyq­tar da óter-keter. Qazaq baletiniń bola­sha­­ǵyn qamdaý  qasıetti boryshymyz bol­ǵan­­dyqtan ilgeri jyljýǵa keder­gi kelti­retin qıyndyqtardy jeńýge múd­deli­miz.

Áńgimemizdiń basynda pań ónerdiń padıshasyndaı Altynaıdyń taǵy qandaı arman-ańsary bar eken degen edik. Surap bilsek, kóp kórinedi. Eń bastysy – qazaq baletiniń aıy ońynan týyp, jahandy jaýlaǵanyn kórý. 

Asyl muratynan aınymas Altynaıdyń aıtqany kelýine tilektespiz.