Batyrdyń ákesiniń qurmetine qoıylǵan «Momysh» bulaǵy kúni búginge deıin bar. Bul jer búginde kópshiliktiń kelip, táý etetin jerine aınalǵan. Endi batyrdyń mereıtoıyna oraı, atalǵan bulaq basyna baratyn bir shaqyrymǵa jýyq jolǵa shaǵaltas tóselip, tegisteldi. Bulaq basy qorshalyp, sán aǵashtary otyrǵyzylǵan. Munyń bári de demeýshilerdiń kómegimen júzege asyp otyr. Sondaı-aq munda arnaıy boı kótergen stellanyń ashylý saltanaty ótti. Shara barysynda «Jýaly» meshitiniń ımamy Seıitqazy qajy Medetbek qasıetti Quran aıattaryn oqyp, batyr rýhyna duǵa jasady. Al aýdannyń Qurmetti azamaty Amanjol qajy Dúráliuly kópshilikke aq batasyn berdi.
Sonymen qatar Jýaly aýdanynyń aýmaǵynda ornalasqan Qazaqstan Respýblıkasy Ulttyq qaýipsizdik komıteti Shekara qyzmetiniń Jambyl oblystyq departamentine qarasty «Baýyrjan Momyshuly» atyndaǵy shekara bólimshesinde batyr bıýsti ashyldy. Jıynda shekara bólimshesiniń jeke quramy merekelik sapqa turǵyzylyp, Memlekettik Gımn shyrqaldy. Sharaǵa qatysqan Jambyl oblysy ákiminiń orynbasary Talǵat Mamaev, Jýaly aýdanynyń ákimi Narbaı Ergebekov, Shekara qyzmeti Jambyl oblystyq departamentiniń basqarma bastyǵy Qanatbek Tynybekov shekarashylar men jınalǵan jurtshylyqty Baýyrjan Momyshulynyń 110 jyldyǵymen quttyqtady. Sondaı-aq batyr bıýstiniń lentasy qıyldy.
Jambyl oblysy
