О́tken aıda prezıdent Mýn Chje In týýdyń tómen deńgeıimen kúreske baǵyttalǵan birneshe strategııany iske qosqan. Onyń ishinde otbasylar úshin aqshalaı yntalandyrý da bar. Jańa júıege sáıkes, 2022 jyldan bastap jańa týǵan ár balaǵa dúnıege kelgenge deıingi shyǵyndardy óteý úshin 2 mıllıon Von (1850 dollar) aqshalaı bonýs beriledi, sonymen qatar bala bir jasqa tolǵanǵa deıin aı saıyn 300 000 von tólenedi. Yntalandyrý 2025 jyldan bastap aı saıyn 500 000 vonǵa deıin artpaq.
Bul máselege Ońtústik Koreıada áıelderdiń jumys pen jeke ómiriniń arasyndaǵy tepe-teńdikti saqtaı almaýy sebep bolýy múmkin kórinedi. Qartaıǵan qoǵam jáne demografııalyq saıasat jónindegi prezıdenttik komıtet daıyndaǵan paket on jyldan astam ýaqyttan beri Azııanyń tórtinshi iri ekonomıkasy atanyp kele jatqan Ońtústik Koreıanyń tómen bala týý deńgeıin yntalandyrý úshin jasalǵan úkimettik bastamalarynyń bir bóligi bolyp otyr. Sondaı-aq el úkimeti tabysy tómen úsheýden kóp balasy bar otbasylardyń balalarynyń ýnıversıtetterdegi oqý aqysyn tólep beredi.
Mamandar áıel adamdardyń bala týýǵa asa jaýapkershilikpen kelýine ózge de áleýmettik máseleler sebep bolǵanyn aıtýda. Zertteýshiler jaǵdaı osylaı jalǵassa, shamamen 52 mıllıon halqy bar eldiń densaýlyq saqtaý jáne zeınetaqy júıesine júkteme artatynyn, salyq túsimderiniń tómendep, jumys kúshiniń jetispeýshiligi baıqalatynyn boljaıdy. Sondaı-aq egde jastaǵy adamdar sanynyń ósýi qan tapshylyǵyn da týdyrýy múmkin.
