«Muǵalimder men oqytýshylardy umytpaǵandary úshin úlken rahmet aıtamyn. Biz bul kúndi asyǵa kúttik. Páter óte jyly, yńǵaıly», dedi oqytýshy Laýra О́tepbergenova.
Úsh balanyń anasy Baǵıla Ydyrysova da elordadaǵy jańa páterdiń kiltin aldy. Ol páterdiń kiltin tapsyratyny týraly habar alǵan kezde qatty qýanǵanyn jasyrmady. «Turǵyn úı kezeginde turdyq. Búkil otbasymyzben óte qýanyshtymyz. Maǵan: «kelip, páterdi tańdap alyńyz», dep habarlaǵanda, baqyttan jylap jiberdim. Qazir bizdiń páterimiz bar ekenine óte qýanyshtymyn», dep aǵynan jaryldy pedagog Baǵıla Ydyrysova.
Pedagogter turǵyn úıdi «Nurly jer» memlekettik baǵdarlamasy aıasynda jáne Bilim jáne ǵylym mınıstrligi men «Qazaqstan ıpotekalyq kompanııasy» AQ arasyndaǵy memorandým sheńberinde aldy.
«Jyl sońynda, elimizdiń eń basty merekesi – Qazaqstan Respýblıkasynyń Táýelsizdik kúni bizdiń áriptes-pedagogterimiz jańa páterdiń kiltterin aldy. Aqtóbe, Aqtaý, Almaty, Qaraǵandy qalalarynda da shamamen 200-den astam pedagog jańa páterge ıe boldy. Biz áriptesterimizdiń osy mereke qarsańynda jańa páterge ornalasqanyna óte qýanyshtymyz. Árıne endi bizdiń áriptesterimiz turǵyn úı máselelerine alańdamaıtyn bolady. Bul – barshamyz úshin úlken qýanysh», dedi Bilim jáne ǵylym vıse-mınıstri Sholpan Karınova.
