Túrkistan oblysy Bas sanıtarlyq dárigeriniń qaýlysyna sáıkes oblys boıynsha karantın rejımin saqtaý, ıaǵnı betperde taǵyp júrý, araqashyqty saqtaý mindettelgen. Búgingi tańda osy talaptardyń oryndalýy tıisti organdardyń qatań baqylaýynda. Onyń ishinde Túrkistan oblysy Polısııa departamentiniń qyzmetkerleri arnaıy qurylǵan mobıldik toptarmen júıeli túrde jumystar júrgizýde. Mysaly, Tólebı aýdanynyń polıseıleri karantındik rejım men sanıtarlyq-epıdemıologııalyq normalardy buza otyryp, ótkizilip jatqan kókpardy anyqtady. Tekserý kezinde jergilikti turǵyn Alataý aýyldyq okrýgi aýmaǵynda 100-ge jýyq adamnyń basyn qosyp kókpar jasaǵanyn aıqyndady.
Mobıldik top birden shoǵyrlanǵan adamdar tobyn tarqatyp, olarǵa karantın talaptaryna jol bermeý týraly túsindirý áńgimelerin ótkizdi. Sondaı-aq shekteý sharalaryna qaramastan kókpar uıymdastyrýshysyn jaýapqa tartty. Oǵan qatysty QR ÁQBtK-niń 425-baby (Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý) boıynsha is-qujattary jınaqtalyp, SES-ke joldandy. Taýarlar men kórsetiletin qyzmetterdiń sapasy men qaýipsizdigin baqylaý qyzmetkerlerimen turǵynǵa 30 AEK kóleminde aıyppul salyndy. Esterińizge sala ketsek, oblysta sanıtarlyq-epıdemıologııalyq normalar talaptaryn buzýshylardy anyqtaý boıynsha, kúndelikti profılaktıkalyq jáne reıdtik is-sharalar júrgizilýde. Sondyqtan Túrkistan oblysynyń polıseıleri azamattardy karantın rejımin qatań saqtaýǵa, medısınalyq betperde kııýge, antıseptıkterdi qoldanýǵa jáne áleýmettik qashyqtyqty saqtaýǵa shaqyrady.
