Jalpy aýyl áli ǵalamtordyń ıgiligin kóre qoıǵan joq. Bul byltyr kóktemde bastalǵan pandemııa kezinde úıden oqýǵa kóshken aýyldaǵy №84 mektep oqýshylary úshin qıyn tıdi.
Sondyqtan ınformatıka pániniń muǵalimi Almasbek Qaldybek aýyl turǵyndary men mektep oqýshylaryn ınternetpen qamtý úshin SMART bólme oılap tapty.
Qarapaıym aýyl muǵalimi oılap tapqan SMART bólme vaıfaı jelisin taratý arqyly turǵyndardyń ınternetke symsyz qosylýyna múmkindik berdi.
Sondaı-aq bólme arqyly qaýipsiz ınternet júıesine baqylaý qoıylyp, qajetsiz saıttar men paıdasyz aqparatty suryptaý men qadaǵalaý júıesi ornatylǵan.
«Meniń SMART bólmeni oılap tabýdaǵy eń basty maqsatym – aýyl balalary men qala balalary arasyndaǵy alshaqtyqty joıý bolatyn. Oblys ortalyqtaryndaǵy zamanýı tehnologııalardan bizdiń oqýshylar da habardar bolsa eken deımin. Onyń ústine ótken jyly bastalǵan pandemııa balalardyń bilim alýyna qıyndyq keltirdi. Qosúıeńki aýylynda tek mektep qana ınternet baılanysymen qamtylǵan. Turǵyndar úshin qol jetimsiz. Sondyqtan antenna túrindegi qabyldaǵysh pen symsyz ınternet taratqysh qurylyǵylaryn oılap taýyp, aýyldaǵylardy da ınternet jelisimen qamtýǵa qol jetkizdik», deıdi Almasbek Qaldybek.
Mektep muǵalimi oılap tapqan SMART bólmeniń taǵy bir jańalyǵy –qashyqtyqtan basqarý júıesi men ata-analar úshin sabaq prosesin provaıderler arqyly aqysyz baqylaý júıesi de iske qosylǵan.
Zamanýı SMART bólmeni qurastyrýshy Almasbek Qaldybek qaýipsizdikti de barynsha nazarǵa alǵan. Atalǵan bólmede sabaq ótkizgen ustazdar kabınettiń jaryǵyn nemese kompıýterlerdi sóndirýdi umyt qaldyrsa, avtomatty túrde qashyqtyqtan óshirýge nemese qosýǵa múmkindik bar. Bólmege kirgen ýaqytyńyzda qaýipsizdik erejelerin qatań saqtaý qajetti daýystyq habarlama arqyly eskertilip, sabaq prosesiniń bastalǵandyǵy habarlanady.
Sonymen qatar, SMART bólmede qımyl qozǵalys pen daýys arqyly da basqarý júıesi ornatylǵan. Sabaq prosesi bastalǵan ýaqytta kirý-shyǵý belgisin kórsetetin belgiler ózdiginen iske qosylyp, óshiriledi. Sabaq aıaqtalǵan soń bólmede ornalasqan barlyq kompıýterlik qurylǵylar avtomatty túrde sóndiriledi. Bul prosesterdi pýlt nemese qolyńyzdaǵy uıaly telefon arqyly basqarý múmkindigi de qarastyrylǵan. Sensorlyq basqarý júıesi de ornalastyrylǵan.
Informatıka páni muǵalimi Almasbek Qaldybektiń shákirtteri de túrli tehnologııalardy oılap taýyp júr. Bólme bazasynda uıymdastyrylatyn úıirmelerge qatysatyn balalar isten shyqqan teledıdar pýltinen ınteraktıvti taqtany qashyqtyqtan basqarý qurylǵysyn jasap shyǵarǵan.
Budan bólek, kún sáýlesiniń túsýine qaraı avtomatty túrde jumys jasaıtyn perde de osy balalardyń jańalyǵy. Kún sáýlesi qatty túsip, bólme ysyǵanda perde ózdiginen tómen túsedi.
Al bultty kúnderi bólme qarańǵy bolmaýy úshin perde ózdiginen kóterilip, jaryq mol túsedi.
