Qazir Úshtaǵandaǵy shashyraı ornalasqan úılerdiń aınalasyn uzyndyǵy 5, eni 2 shaqyrymǵa sozylǵan qum qorshap jatyr. Tipti dóńge aınalǵan qumnyń bıiktigi turǵyn úımen teńesken. Máselen, aýyl shetindegi Erejepovter otbasy kúndelikti tirligin qum kúreýmen bastaıdy. Otanasy Aqtolqynnyń aıtýynsha, qysy-jazy toqtaýsyz jyljyǵan qum kóshkini turǵyn úılerdi basyp qalýy múmkin.
Qumnan tóngen qaýip tek Erejepovter otbasyn ǵana alańdatyp otyrǵan másele emes. Bul – Úshtaǵandy meken etken 145 otbasyǵa ortaq qaýip. Desek te olardyń eshqaısysy bul aýyldan kóshkisi joq. Munyń sebebin olar qumdy óńirdiń mal ustaýǵa qolaılyǵymen baılanystyrady.
– Tórt túlik ósirgen qazaqpyz ǵoı. Úshtaǵannyń jaıylymdyq jeri shúıgin. Jer astynan shyǵyp jatqan tushy sýy bar. Kógildir otynǵa qol jetkizdik. Aýdan ortalyǵynan shalǵaı bolǵanymen, janǵa da, malǵa da jaıly jerdi tastap ketýge qımaımyz. Bir balamyz qyrda mal ustap otyr. Kúnkórisimizge jetetin tabys tabýǵa bolady. Tek bizdi qınaıtyny – qumnyń qaýpi men jol qatynasynyń nasharlyǵy. Osy máseleler sheshimin tapsa, kindik kesken mekennen artyǵy joq, – deıdi kóp balaly ana Balǵanym Qapanqyzy.
Qumnan tóngen qaýip tek Úshtaǵan aýylynyń turǵyndaryn ǵana alańdatyp otyrǵan joq. Oblystyq tabıǵı resýrstardy basqarý jáne tabıǵatty paıdalanýdy retteý basqarmasynyń basshysy Qadyrjan Arystannyń aıtýynsha, mundaı qaýip osy kezge deıin Jylyoı aýdanyndaǵy Maıkómgen, Isataı aýdanynyń Zabýryn, Isataı, sondaı-aq Qyzylqoǵa aýdanyna qarasty Mııaly, Jasqaırat aýyldaryna da tóngen eken. Sol sebepten bul aýyldardyń aınalasyna qum kóshkinine qarsy jas kóshetter egilipti. Endi osyndaı ádis Úshtaǵan aýylynyń mańyna da qoldanylǵaly otyr. О́ıtkeni sońǵy on jylǵa jýyq merzimnen beri bul aýyldy qum qaýpinen qutqarý úshin mundaı jumys atqarylmaǵan eken.
– Atalǵan aýyldyń aýmaǵy zerdelenip, 33,8 gektar jerge qum kóshkinin toqtatý jumysyn júrgizý máselesi aýdan ákimdigimen kelisildi. Bıyl 10 gektar aýmaqqa ornalastyrý jobasy qolǵa alynady. Osyǵan oraı jeke kásipker 1 mln 200 myń teńge alyp, aýyl irgesine sekseýil egýdi bastaıdy. Bul jumys kezeń-kezeńimen júzege asady, – deıdi Qadyrjan Arystan.
Atyraý oblysy
