Jylyoı aýdanyndaǵy Teńiz ken ornynda 30 449, Maqat aýdany aýmaǵyndaǵy Qarabatan eldi mekeni tusyndaǵy nysandarda 2600, «Qashaǵan» ken ornyda 437 adam jumys isteıdi. Al «Embimunaıgaz» AQ-nyń Jylyoı, Maqat, Isataı jáne Qyzylqoǵa aýdandaryndaǵy óndiris ornynda 1884 adam eńbek etip jatyr.
«Saılaý ýchaskeleri qurylmaǵan, jol qatynasy qıyn aýmaqtarda saılaýshylardyń ótinishi negizinde daýys berý uıymdastyrylady. Daýys berýshiler bul úshin ýchaskelik saılaý komıssııasyna 10 qańtar, saǵat 12.00-ge deıin jazbasha ótinish qaldyrýy tıis. Osy quqyqty jekelegen saılaýshylar densaýlyq jaǵdaıyna baılanysty paıdalana alady. Bul jaǵdaıda saılaýshylardyń turǵan jerinde daýys berý uıymdastyrylady. «Qashaǵan» ken ornyna arnaıy tikushaq jiberiledi», habarlady oblystyq aýmaqtyq saılaý komıssııasynan.
Atyraý oblysynyń koronavırýstyq ınfeksııanyń taralýy boıynsha «qyzyl aımaqqa» enýine baılanysty óndiris mekemelerinde qatań sanıtarııalyq shekteýler engizilip otyr. Osyǵan oraı obektige kirgen jáne shyqqan azamattarǵa karantındik talaptardy qatań ustaný mindettelip otyr. Sonymen qatar daýys berýshide mindetti túrde PTR synamasynyń teris qorytyndysy bolýy tıis.
