Elbasy bıylǵy saıası doda erekshe qarqyn alǵanyn, sondaı-aq bul baǵytta Parlament pen jergilikti zań shyǵarý organdardyń jumysyn jetildirýge basymdyq berý kerektigin aıtty.
«Biz ózimizdiń bolashaǵymyz ben qazaqstandyqtardyń ómiri órkendep, jaqsarýy úshin daýys beremiz. Bıylǵy saılaýǵa daıyndyq erekshe qolǵa alynyp, aldyn ala daýys berý, ıaǵnı praımerız arqyly ótip, ony máslıhattar men Májiliske jańa adamdardy, ásirese jastar men áıelderdi, belsendi azamattarymyzdy tartý úshin júrgizildi», dedi Qazaqstannyń Tuńǵysh Prezıdenti.
Sondaı-aq Elbasy qazaqstandyqtardy osy múmkindikti jibermeı óz tańdaýyn jasaýǵa shaqyrdy.
«Osyndaı turaqty saıası jaǵdaıda álemge aýyzbirligimizdi kórsetip, keleshegimiz úshin daýys berý – túpkilikti maqsatymyz. Daýys berýge úlgermegender bolsa, ózderiniń konstıtýsııalyq quqyqtaryn oryndaýǵa shaqyramyn. Prezıdent retinde alty ret saılaýdan óttim. Túrli kezeńder bolǵanyn jaqsy bilesizder. Birneshe daǵdarystan óttik. 1998 jylǵy ońtústik-shyǵys daǵdarysy jáne 2007-2009 jyldar aralyǵyndaǵy aýqymdy qarjy daǵdarysy. Qazir búkil álemge taraǵan pandemııa jaǵdaıynda turmyz. Alaıda uıymshyldyq pen der kezinde qabyldanǵan memlekettik sharalar arqyly «jasyl» aımaq deńgeıine tústik. Demek, basqa memleketterge qaraǵanda qaýipti seıilte aldyq», dedi Nursultan Nazarbaev.
Elbasynyń aıtýynsha, qazir eń bastysy pandemııany eńserip, pandemııadan turalaǵan ekonomıkany qalpyna keltirý úshin kózdelgen josparlardy oryndaýǵa kirisý qajet.
